كىشى تالدىكولگە كارىز سۋى توگىلىپ جاتىر ما?

فوتو: inbusiness.kz

«كىشى تالدىكول №7 ايماعى قالدىققا تولىپ جاتىر» دەپ دابىل قاعادى تۇرعىندار. بۇل تۋرالى «ۆلاست» حابارلادى.

«شامامەن ءبىر اي بۇرىن تۇندە كارىز سۋلارىنىڭ كولگە قالاي اعىلىپ جاتقانىن بايقادىم. وسى كەزدەرى قولاڭ ءيىس پايدا بولدى. كارىزدىڭ كەسىرىنەن كول جاسىل تۇسكە بويالعان. بىلتىر مۇندا اققۋلار ۇشقان, ال بيىل ولاردىڭ ءىزى دە كورىنبەيدى», — دەيدى جەرگىلىكتى تۇرعىنداردىڭ ءبىرى ايعانىم دۇيسەمباەۆا.

اكىمدىك ءۇنسىز ەمەس. جاۋاپتى مەكەمە مۇنى جوققا شىعاردى, قازىر وندا جىلۋ ماگيسترالىنىڭ قۇرىلىسى ءجۇرىپ جاتقانىن, ءبىراز ۋاقىتتان كەيىن ونى اباتتاندىرۋ جوسپارلانىپ وتىرعانىن حابارلادى.

«بۇل اۋماقتا قۇرىلىس قوقىستارىن تازارتۋ جۇمىستارى جۇرگىزىلگەن. قازىر جىلۋ ماگيسترالىن توسەۋ ءۇشىن ترانشەيا دايىندالىپ جاتىر», — دەلىنگەن ۆەدومستۆونىڭ جاۋابىندا.