مادەنيەت
ديدارا الينا: كىتاپ – ەلدىڭ رۋحاني تامىرى
فوتو: جەكە قورىنان
«Arman—PV» باسپاسىنىڭ باس ديرەكتورى ديدارا الينامەن سۇحبات
جۋرناليست:
بيىل قازاقستاندا العاش رەت ۇلتتىق كىتاپ كۇنى اتالىپ ءوتتى. بۇل باستامانىڭ ءمانى نەدە دەپ ويلايسىز?
ديدارا الينا:
ۇلتتىق كىتاپ كۇنىن بەلگىلەۋ – جاي عانا مادەني شارا ەمەس, بۇل – تاريحي شەشىم. بۇل كۇن – ەلدىڭ رۋحاني بەتبۇرىسىن كورسەتەتىن سيمۆول. سەبەبى كىتاپ – ۇلتتىڭ ويى مەن بولمىسىن, بولاشاعىن ايقىندايتىن باستى قۇرال. مەملەكەت تاراپىنان وسى كۇننىڭ بەكىتىلۋى – قوعامعا باعىتتالعان تەرەڭ ويلى قادام. كىتاپ ارقىلى تاربيەلەنگەن ۇرپاق – ەلگە تىرەك بولاتىن تۇلعاعا اينالادى. ءبىز, باسپا سالاسىندا جۇرگەن ادامدار, بۇل كۇندى بولاشاققا جاسالعان سالماقتى ينۆەستيتسيا دەپ قابىلدايمىز.
جۋرناليست:
ءسىز باسقارىپ وتىرعان «Arman-PV» باسپاسى ۇلتتىق كىتاپ كۇنىنە قانداي ۇلەس قوستى?
ديدارا الينا:
ءبىزدىڭ ۇجىم «ۇلتتىق كىتاپ» اتتى رەسپۋبليكالىق بايقاۋعا قاتىسىپ, «ەڭ ۇزدىك اۋدارما كىتاپ» اتالىمىندا جەڭىمپاز اتاندى. بۇل – ءبىز ءۇشىن ۇلكەن مارتەبە. بايقاۋعا ءبىز ۇسىنعان پوپ-اپ فورماتىنداعى بالالارعا ارنالعان كىتاپتار – ەرەكشە مازمۇن مەن فورمانى ۇشتاستىرعان جوبالار. جۇلدە رەتىندە 2 ميلليون تەڭگە يەلەندىك. بىراق بۇل جەردە اقشا ەمەس, مەملەكەتتىك دەڭگەيدەگى مويىنداۋ, كاسىبي ەڭبەكتىڭ باعالانۋى ماڭىزدى. بۇل بىزگە الداعى جۇمىستا جاڭا سەرپىن بەرەدى.
جۋرناليست:
«Arman-PV» تەك وقۋلىقتار, بالالار ادەبيەتىمەن شەكتەلمەيتىنىن بىلەمىز. سوڭعى ءىرى جوبالارىڭىزدىڭ ءبىرى – «قازاقستان. جەڭىسكە قوسقان ۇلەسى» اتتى ەڭبەك. وسى تۋرالى كەڭىرەك ايتىپ وتسەڭىز.
ديدارا الينا:
ءيا, بۇل – ءبىز ءۇشىن ەرەكشە ءمانى بار جوبا. جەڭىستىڭ 80 جىلدىعىنا ارنالعان قوس ءتىلدى فوتوالبوم – ۇلتتىق تاريحي جادتى ساقتاۋ, ۇرپاقتار ساباقتاستىعىن جالعاۋ جولىنداعى ناقتى قادام. بۇل كىتاپ – جاي ەستەلىك ەمەس. بۇل – ارحيۆكە, دەرەككە, بەينە مەن سوزگە نەگىزدەلگەن رۋحاني ەسكەرتكىش. جوبانى بەلگىلى تەلەجۋرناليست مايا بەكباەۆامەن بىرلەسە جاسادىق. ول كىسىنىڭ وسى تاقىرىپتاعى دەرەكتى فيلمدەر تسيكلىنىڭ جالعاسى ىسپەتتەس. كىتاپ قازاقستان رەسپۋبليكاسى پرەزيدەنتىنىڭ تەلەراديوكەشەنىنىڭ قولداۋىمەن جارىق كوردى. بۇل – كەزدەيسوق باستاما ەمەس, «جوشى حان» تۋرالى العاشقى تاريحي ەڭبەگىمىزدىڭ زاڭدى جالعاسى.
جۋرناليست:
باسپا ميسسياسى تەك شىعارىلىممەن شەكتەلمەيتىنى بەلگىلى. سىزدەر ءۇشىن باسپاگەرلىك نە?
ديدارا الينا:
ءبىز ءۇشىن باسپا – تەك كاسىپ ەمەس. بۇل – قوعامدىق, مادەني جاۋاپكەرشىلىك. «Arman-PV» 23 جىل بويى قازاقستاندا وقۋلىقتار مەن وقۋ-ادىستەمەلىك كەشەندەر شىعارىپ كەلەدى. ءبىزدىڭ مىندەت – بالاعا ۇعىنىقتى, مۇعالىمگە پايدالى, جۇيەگە سەنىمدى ءبىلىم قۇرالدارىن ازىرلەۋ. سوڭعى جىلدارى ءبىز Ekitap.kz تسيفرلىق پلاتفورماسىن ەنگىزىپ, مىڭداعان مەكتەپكە ساپالى ونلاين وقۋ مۇمكىندىگىن ۇسىندىق. بۇل تەك تەحنولوگيا ەمەس – بۇل وقۋ مادەنيەتىن وزگەرتۋ جولىنداعى ناقتى شەشىم.
جۋرناليست:
تاريحقا ورالايىق. سىزدەردىڭ «جەڭىسكە قوسقان ۇلەس» اتتى ەڭبەكتەرىڭىز Eurasian Book Fair كورمەسىندە تانىستىرىلدى. قانداي اسەر الدىڭىز?
ديدارا الينا:
بۇل حالىقارالىق دەڭگەيدەگى كورمەدە كىتاپتى تانىستىرۋ – ءبىز ءۇشىن ۇلكەن مۇمكىندىك بولدى. وقىرمان تاراپىنان ەرەكشە قىزىعۋشىلىق بايقالدى. بۇل كىتاپ جاي دەرەككە ەمەس, تۇلعالار تاعدىرىنا, ەلدىك ەرلىككە قۇرىلعان. ول – ۇرپاق ساناسىنا سىڭەتىن, شىنايى قۇرمەتكە لايىق ەڭبەك. تەك قازاقستاندىق ەمەس, الەمدىك اۋقىمداعى وقىرمانعا ارناپ جاسالدى. سوندىقتان ءبىز بۇنى تەك باسپا ءونىمى ەمەس, تاريحي جادىنىڭ فورماسىنا اينالعان تۋىندى دەپ ەسەپتەيمىز.
جۋرناليست:
سىزدىڭشە, كىتاپ ارقىلى قوعامعا قالاي ىقپال ەتۋگە بولادى?
ديدارا الينا:
ءبىلىم مەن مادەنيەت تەك رەسمي يدەولوگيا ارقىلى ەمەس, كىتاپ ارقىلى بەرىلەدى. ەگەر قوعام كىتاپ وقۋدى ادەتكە اينالدىرسا – ويلاۋ تەرەڭدەيدى, پىكىر ءورىسى كەڭەيەدى. ءبىز سوعان ۇلەس قوسۋعا تىرىسىپ كەلەمىز. بۇگىنگى تاڭدا قازاق بالاسىنا ساپالى ءبىلىم بەرۋ – ۇلتتىق قاۋىپسىزدىكپەن تەڭ. ال ول ءبىلىم, ەڭ الدىمەن, ساپالى كىتاپتان باستالادى.
