«كىتاپتىڭ مۇقاباسىنا قاراپ باعا بەرۋدى قويايىق»: Unknownkazak بلوگىنىڭ اۆتورى داۋ تۋدىرعان جايتقا پىكىر ءبىلدىردى

ەل اراسىندا مۇقاباسىنا قاراي تۇسىنىسپەۋشىلىك تۋدىرعان «قازاقتاردى قالاي باسقارۋ كەرەك» اتتى كىتاپ بارلىق ساتۋ نۇكتەسىنەن الىندى. بۇل تۋرالى AmalBooks باسپاسىنىڭ نەگىزىن قالاۋشى, باسپاگەر باقىتجان بۇقارباي ءوزىنىڭ ينستاگرام پاراقشاسىندا مالىم ەتتى. وسىدان كەيىن Unknownkazak بلوگىنىڭ اۆتورى دياس كامەريدانوۆ اتالمىش جايتقا قاتىستى پىكىر ءبىلدىردى, دەپ حابارلايدى Skifnews.kz اقپاراتتىق پورتالى.

قازاقتاردى قالاي باسقارۋ كەرەك? ءبىزدى باسقارۋدىڭ قاجەتى جوق, ارامىزعا وت سالىپ قويسا عانا جەتكىلىكتى. قانشاما جىلداردان كەيىن الدىمەن پاتشالىق رەسەيدىڭ, ودان كەيىن كەڭەس وداعىنىڭ وتارلاۋىندا بولعان ءبىز ءالى دە نەگىزگى ساباقتى العان جوقپىز. بىرلىگىمىزدەن ايىرىلىپ,  ءبىر-ءبىرىمىزدى دوس ەمەس دۇشپان كورە باستاعاندا ءبىز تۇتاستىعىمىزدان ايرىلامىز. بىزدى كۇشپەن باسىپ الۋعا بولمايتىنى تاريحتان بەلگىلى. ورىس, تسين, جوڭعار دەگەن كۇشتى يمپەريالاردىڭ قورشاۋىندا ءبىز مايداندا ەشكىمگە ەسە بەرمەدىك. ءبىزدى قۋلىقپەن, پاراقورلىقپەن الدى. كەيىن شاشىلعان بۇتاق سەكىلدى بىرتىندەپ سىندىردى. بۇل كىتاپ ءدال وسى تۋرالى. قالاي جانە قانداي جولمەن وتارلانعانىمىز تۋرالى. بۇل كىتاپ بوداندىققا ءوز ەركىمەن كىرۋ بولماعانىن, رەسەي يمپەرياسىنىڭ ءبىزدى جوڭعارلاردان قۇتقارماعانىن اشىق كورسەتەدى. بۇل كىتاپ جەرىمىزدى باسىپ الۋدىڭ ادىستەرى تۋرالى. ەڭ باستىسى, بۇل كىتاپ بولاشاقتا وسى قاتەلىكتەردى قايتالاماۋ تۋرالى.

دياس كامەريدانوۆ كىتاپ اۆتورلارىن جەكە تانيتىنىن, ولاردىڭ ەڭبەگى ۇلكەن ەكەنىن ايتتى. ⠀

باقىتجاندى بۇرىننان تانيمىن, سىيلايمىن. ول ۇلى جۇمىستاردى تىندىرىپ ءجۇر. مۇراعاتتارمەن جۇمىس ىستەپ, قازاق تىلىندە كىتاپتار شىعارادى. مەن ونىڭ قالاي قينالا كىتاپ شىعارۋ ءۇشىن اقشا ىزدەيتىنىن بىلەمىن. ويتكەنى ول وڭاي ءىس ەمەس. مەن نۇرقوجانى دا تانيمىن, قۇرمەتتەيمىن. ول تاريحتى ناسيحاتتاۋدا ۇلكەن جۇمىستار اتقارىپ ءجۇر. سوندىقتان بۇل جاعىمسىز جايتقا كۋا بولۋ ماعان اۋىر ءتيدى. ەشكىمنىڭ جامان نيەتى بولماعانىنا سەنىمدىمىن. ءبىز ءبارىمىز بىردەي نارسەنى ىستەپ جاتىرمىز. ونداي تۇسىنىسپەۋشىلىكتەر بولماس ءۇشىن كوبىرەك ارالاسىپ تۇرايىق. بىراق كىتاپتاردىڭ ساتىلىمنان الىنىپ تاستالعانى دۇرىس ەمەس دەپ ويلايمىن. ءومىر سىزگە ليمون بەرسا, ودان ليموناد جاساڭىز. مەنىڭ ويىمشا بۇل حەيت كەرىسىنشە كىتاپقا تەگىن حايپ جاساپ بەردى. ەندى ونى وقىعىسى كەلەتىندەردىڭ سانى ارتۋى مۇمكىن. ال كىتاپقا مۇقاباسىنا قاراپ باعا بەرۋدى قويايىق.