قمدب ايەلدىڭ كۇيەۋىنىڭ تەگىن الۋىنا قاتىستى ءپاتۋا شىعاردى

فوتو:اشىق دەرەككوز

قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمى ايەلدىڭ كۇيەۋىنىڭ تەگىن الۋىنا قاتىستى ءپاتۋا شىعاردى, دەپ جازدى qandastar.kz

قمدب وكىلدەرى شاريعات بويىنشا ءار ادام ءوز تەگىمەن اتالۋى ءتيىس ەكەنىن ايتتى.

اللا تاعالا قۇراندا: «اسىراندى بالالارىڭدى ءوز اكەسىنىڭ اتىمەن اتاڭدار. اللانىڭ قۇزىرىندا ەڭ دۇرىسى سول» دەپ بۇيىردى, – دەپ ەسكە سالدى قمبد.

وسى اياتتى العا تارتىپ كەيبىر عالىمدار تۇرمىسقا شىققان قىزعا كۇيەۋىنىڭ تەگىنە وتۋگە تىيىم سالسا, كەيبىر عالىمدار ايەلدىڭ كۇيەۋىنىڭ تەگىنە ءوتۋ عۇرىپتا قالىپتاسقان ءارى ەلگە تانىتۋ ماقساتى بولسا, وقاسى جوق دەپ مالىمدەدى.

– ويتكەنى قۇراندا: «نۇحتىڭ ايەلى جانە لۇتتىڭ ايەلى» دەپ ايەلدەردى كۇيەۋىنىڭ اتىمەن تانىتىپ تۇر. ءابۋ ساعيد ءال-حۋدريدەن (اللا وعان رازى بولسىن) ريۋايات ەتىلگەن حاديستە: «ماسعۋد ۇلىنىڭ ايەلى زەينەپ (اللا وعان رازى بولسىن) اللا ەلشىسىنە (وعان اللانىڭ سالاۋاتى مەن سالەمى بولسىن) كەلىپ, (كىرۋگە) رۇقسات سۇرايدى. «ۋا اللانىڭ ەلشىسى! زەينەپ كىرۋگە رۇقسات سۇراپ تۇر», – دەگەندە, ول: «قايسى زەينەپ?», – دەپ سۇرايدى. «ماسعۋد ۇلىنىڭ ايەلى», – دەپ جاۋاپ بەرەدى. ول: «كىرسىن», – دەيدى. سوندا وعان كىرۋگە رۇقسات بەرەدى», – دەلىنگەن.

سوندىقتان تۇرمىسقا شىققان ايەل ءوز اكەسىنىڭ اتىمەن اتالۋى ءتيىس. ونى وزگەرتۋ – حارام. ال كۇيەۋىنىڭ تەگىنە اۋىسۋىنىڭ وقاسى جوق, بىراق مىندەتتى ەمەس. كۇيەۋى دە ونى ءوز تەگىن الۋعا ماجبۇرلەۋى دۇرىس ەمەس.