«قوعام بارىن بەردى, كوتەرە المادى»: يليا يلين وتەشوۆپەن قاتىناسى تۋرالى ايتتى

فوتو: اشىق دەرەككوز

قازاقستاندىق زىلتەمىرشى يليا يلين راحيم وشاقباەۆقا بەرگەن سۇحباتىندا الماس وتەشوۆپەن قارىم-قاتىناسى تۋرالى ايتتى, – دەپ حابارلايدى  qandastar.kz Massaget.kz-كە سىلتەمە جاساپ.

ول اۋىر اتلەتيكادان الەم چەمپيوناتىنىڭ كۇمىس جۇلدەگەرى, ازيا چەمپيونى بولعان الماس وتەشوۆپەن قارىم-قاتىناسى تۋرالى ايتتى.

«الماس – مەنىڭ دوسىم, كەزىندە بىرگە جاتتىققانبىز, كوماندادا بولىپ, مەنى قولداعان جانداردىڭ ءبىرى. ءبىر ۋاقىتتا بارىنە قيىن بولاتىن ءسات بولادى. ارينە, ونىڭ وسىنداي كۇيگە تۇسكەنى ايانىشتى. 10 جىل بويى ول ىشىمدىككە ءۇيىر بولدى. كوپ شىندىقتى ايتتى. رەنىشتەرى دە بار, ونىڭ جان دۇنيەسىندەگى ايقايدى قوعامنىڭ ەستىگەنىن قالادى. ول قازىر كلينيكادا ەمدەلىپ جاتىر. جاعدايى جاقسى. قوعام وعان بارىن بەردى, كومەكتەستى, بىراق ول كوتەرە المادى. ەشكىم ودان تەرىس اينالعان جوق. سوندىقتان, مەنى دە, ونى دا حالىقتىڭ كىنالاماعانىن قالار ەدىم. ول اقىلعا كەلىپ, ىشىمدىك ىشۋدەن باس تارتسا – بۇل ءبىزدىڭ جەڭىسىمىز بولار ەدى. جاقىن كۇندەرى ەم قابىلداپ بولعان سوڭ بەينەجازباعا ءتۇسىرىپ, جاريالايتىن بولامىن», – دەدى ول.

سونداي-اق, يليا يلين وليمپيادالىق مەدالداردى تارتىپ العان ءساتى جايلى ايتىپ بەردى.

«28 جاسىمدا وليمپيادالىق مەدالداردى تارتىپ العان كەزدە نە ىستەرىمدى بىلمەدىم. مۇنداي وقيعا ءبىرىنشى رەت بولىپ تۇر. ءسويتىپ فەدەراتسيادان زاڭگەر سۇرادىم. ءارى قاراي كۇرەسكىم كەلدى. ولار قارجىلاندىرۋدى ۇزاق كۇتتى, كەيىن زاڭگەرلەرمەن كومەكتەستى. نەگىزى اياعىنا شەيىن بارمادىم, كۇرەسپەدىم. ءوزىمدى قۇربان رەتىندە كورسەتىپ, ايانىشتى بولعىم كەلمەيدى. بىراق سول كەزدە قاسىمدا باعىت بەرەتىن مىقتى ادام بولمادى. وكىنىشكە وراي, جالعىز قالدىم. ءبارى دە ءبىراۋىزدان «وي, شىدا» دەگەننەن باسقا ەشتەڭە ايتپادى. شۆەيتسارياداعى زاڭگەرلەرگە دە باردىم. بىراق ەشتەڭە ىستەي المايتىنىن ايتتى. ءار كۇن سايىن وليمپيادالىق مەدالدارىمدى قايتارىپ الۋدىڭ جولدارىن ويلايمىن. جەڭىلسەم دە ءومىر بويى كۇرەسىپ وتەتىن شىعارمىن», – دەدى ول.