قوعام بەلسەندىلەرى زەينەتاقى تولەمىن قايتا قاراۋدى سۇرادى

فوتو: اشىق دەرەككوز

جەلىدە ءبىر توپ قازاقستاندىق جۇرتتى “لايىقتى زەينەتاقى تولەمى ءۇشىن” تاقىرىبىندا جاريالاعان پەتيتسياعا قول قويۋعا شاقىردى. ايتۋلارىنشا زەينەتاقىنىڭ قازىرگى مولشەرى ينفلياتسياعا ساي ەمەس جانە ءومىر سۇرۋگە جەتكىلىكسىز. بۇل تۋرالى Stan.kzاقپارات اگەنتتىگى حابارلايدى.

وزگەلەردى پەتيتسياعا قول قويۋعا شاقىرعان ءبىر توپ ادامنىڭ ۆيدەوسى TikTok جەلىسىندە تارادى.

“جىل سايىن ۋاكىلەتتى مەملەكەتتىك ورگاندار ينفلياتسيا دەڭگەيىنىڭ 5-7%-دان اسپاعانى تۋرالى اقپارات بەرەدى. ال ۇلتتىق ستاتيستيكا بيۋروسى قازاقستاندا ورتاشا جالاقى 400 مىڭ تەڭگەدەن اسقانى تۋرالى كورىنەۋ جالعان اقپارات جاريالادى.

الايدا قانداي دا ءبىر سەبەپتەرمەن نەگىزگى ازىق-ت ۇلىك: ءسۇت ونىمدەرى 50%, ەت 30%, نان 50% قىمباتتادى. كوممۋنالدىق قىزمەتتەرگە تاريفتەر كوتەرىلدى. ساعات بەلدەۋىنىڭ اۋىسۋى ەلەكتر ەنەرگياسىن كوپ پايدالانۋعا اكەلسە دە, ەلەكتر ەنەرگياسى 10%, گاز 60%, قوقىستى شىعارۋ 30%, جىلىتۋ 15% وستى”, – دەدى ازاماتتار.

ودان بولەك, ۇندەۋ جاساۋشىلار ينفلياتسيانىڭ دا ءوسۋ پايىزى قاتە كورسەتىلگەن دەپ شاعىمداندى.

“الماتىدا قوعامدىق جول ءجۇرۋ قۇنى ءبىر جىلدا ەكى رەت ءوستى. 1 قازاننان باستاپ, تەمىر جول بيلەتتەرىنىڭ قۇنىن 20% كوتەرمەك. اۋە بيلەتتەرىنىڭ قۇنى تىپتەن شارىقتاپ تۇر. ينتەرنەت پەن ۇيالى بايلانىس قىزمەتتەرى دە قىمباتتادى.

ينفلياتسيانىڭ 5-7% وسكەنى تۋرالى اقپارات جالعان. زەينەتاقى مەن الەۋمەتتىك تولەمدەر قۇنى بۇعان ساي كەلمەيدى. زەينەتاقى مولشەرى ينفلياتسيا كولەمىنەن از. بۇل زەينەتكەرلەردىڭ, حالىقتىڭ الەۋمەتتىك وسال توپتارىنىڭ ءومىرىن قيىنداتىپ جاتىر. ەڭ قىنجىلتارلىعى, زەينەتاقى قورىنداعى قاراجات بۇل سالاعا قاتىسى جوق باسقا ماقساتتارعا جۇمسالىپ جاتقانى. بۇل حالىقتى توناۋمەن بىردەي! قۇرمەتتى قازاقستاندىقتار, بارلىعىنىڭ تۋىستارى, كورشىلەرى, كوپبالالى وتباسى مەن ەرەكشە قاجەتتىگى بار تانىستارى بار. ءبىز ءوزىمىزدىڭ قۇقىعىمىزدى قورعاپ, كۇرەسۋىمىز ءۇشىن 50 مىڭ قول جيناۋىمىز كەرەك. سوندىقتان ارىپتەستەر مەن دوستاردى بارشا حالىقتى لايىقتى زەنەتاقى كولەمى پەتيتسياسىنا قول قويۋعا شاقىرامىز”, – دەدى جۇرتشىلىق.

قازىر epetition.kz سايتىنداعى پەتيتسياعا 1790 ادام قول قويعان.