قوعام بەلسەندىسى قايرات نۇرتاستان اتاعىن قايتارۋدى تالاپ ەتتى

فوتو: اشىق دەرەككوز

قوعام بەلسەندىسى رۇستەم اشەتاەۆ ءانشى قايرات نۇرتاستان شىمكەنتتىڭ قۇرمەتتى ازاماتى اتاعىن قايتارىپ الۋدى تالاپ ەتتى, دەپ حابارلايدى El.kz اقپارات اگەنتتىگى.

بۇل توي انشىسىنە 2019 جىلى “عايىپتان” شىمكەنتتىڭ قۇرمەتتى ازاماتى دەگەن اتاق بەرىلدى. كىمنىڭ ىقپالىمەن بەرىلگەنى بەلگىلى عوي. ونى ۇسىنعان ادامنىڭ كوڭىلىن قيماي سول كەزدەگى ءماسليحات دەپۋتاتتارى قولداپ بەكىتىپ بەردى.  نەگىزى بۇل اتاققا ۇسىنىلاتىن ۇمىتكەرلەردى بەلگىلى ءبىر كريتەريالار ارقىلى ىرىكتەلەدى. ءارى ءوز تالاپتارى بار. بۇل ءانشىنى قانداي “ەرەن ەڭبەگى” ءۇشىن بەرىلگەنى ماعان جۇمباق. انشىلىگى ءۇشىن دەيىن دەسەڭ ەشقانداي حالىقارالىق جۇلدە الماعان “فونوگرامششيك”. قايىرىمدىلىق جاساۋمەن اتى شىقپاعان. ناقتى قالامىز بەن حالقىمىزعا تيگىزگەن ەشقانداي پايداسى جوق. قالامىزدى دامىتۋعا قوسقان ۇلەسى بولسا ءبىر ءسارى تىم قۇرىعاندا. ونداي پايداسى ءتيدى دەپ تە ايتا المايمىن, – دەيدى ول.

رۇستەم اشەتاەۆ مۇنداي اتاقتىڭ نە سەبەپتى بەرىلگەنىن سۇرادى.

سوندا بۇل تويدىڭ انشىسىنە باي-شونجارلاردىڭ تويىندا ءان سالعانى ءۇشىن بەرىلدى مە?! تويعا شىقسا اقشاعا شىقتى. الدە, قالا مەن مەكتەپتەردە تەگىن كونتسەرتتەر بەردى مە?! نە ءۇشىن بەرىلدى بۇعان سوندا?! الدە, جاستارعا ۇلگى دەپ بەردى مە? ۇلگى دەپ بەرگەن بولسا, ول ۇلگى بولىپ ءجۇر مە قازىر? ولاي بولسا ۇلگى ەمەس قازىر دەپ بۇل اتاعىن كەرى قايتارۋ كەرەك. وعان قازىرگى ءماسليحاتتىڭ تولىق قۇزىرەتى بار. كەزىندە كەتكەن قاتەلىكتى تۇزەتەتىن ۋاقىت كەلدى. بۇلاردىكى راحات ەكەن. بۇزاقىلىق جاساپ انا جاققا “كىرىپ-شىعەپ”, ونىسىنان ۇيالماستان ىرجالاق-ىرجالاق ەتىپ ءازىلىن ايتىپ ءانىن شىرقاپ جۇرە بەرەتىن. نەگىزى بۇل اتاقتىڭ قۇنى وتە جوعارى. وعان ءوز سالاسىنىڭ ەڭ لايىقتىسى, قالاعا ابدەن ەڭبەگى سىڭگەن دەپ قوعامدا مويىندالعان ازاماتتارعا عانا بۇيىرادى. ال مىناندايلارعا بەرۋ ارقىلى ءبىز بۇل ابىرويلى اتاقتىڭ قۇنىن قولدان ءتۇسىرىپ جاتىرمىز. ال بۇل اتاقتىڭ ابىرويىن اسقاقتاتۋىمىز ءۇشىن وسىندايلاردان قايتادان كەرى قايتارۋىمىز كەرەك. بۇل اتاقتىڭ ابىرويىن وسىلاي عانا كوتەرەمىز, – دەيدى بەلسەندى.

ول الداعى ۋاقىتتا ۇمىتكەرلەردى ىرىكتەۋ كەزەڭى قاتاڭ جۇرەتىنىن اتاپ ءوتتى.

ءارى كەلەسى جولى ۇمىتكەرلەردى ىرىكتەردە ويلاناتىن بولامىز. بۇل ساباق بولادى. ونىڭ “ەركەلىگىن” تويداعى فاناتتارى تويدا كوتەرە بەرسىن. ەستى قوعام ءاردايىم ادىلدىك جاعىندا بولۋىمىز كەرەك. بۇل بارلىق وبلىس, قالا, اۋداندارعا تيەسىلى ورتاق ماسەلە. تۇبىندەگى ويى ورتاق. قايرات ءجاي عانا تىلگە تيەك, مىسال عانا!, – دەدى ءانشى