«Kók jıgýlı», «18 ben 25» hıt ánderiniń avtory Anglııada qulpynaı terip júr

Halyqqa keń taraǵan “Kók jıgýlı”, “Sen maǵan massyń”, “18 ben 25”, “Mahabbat joq deme, janym” ánderiniń avtory, kompozıtor Nurzat Rahatov Anglııada qulpynaı terip júr, dep habarlaıdy

Sazger Stan.kz tilshisine sheteldegi jumysy men ómiri týraly aıtyp berdi. Aqynnyń sózinshe, buǵan deıin Almaty oblysy Jambyl aýdany Qaınazar aýylyndaǵy orta mektepte muǵalim bolyp jumys istegen. Aılyǵy mardymsyz bolǵasyn, Anglııaǵa ketýdi josparlaǵan kórinedi.

“2024 jyldyń mamyr aıynda keldim. Mekteptegi muǵalimderdiń ásirese jas mamandardyń jalaqysy az ekeni belgili. Úsh jyl mektepte jumys istep júrip, tabysyma kóńilim tolmady. Sodan shetelden jumys izdedim. Anglııa týraly da biraz aqparat izdep, vıza alyp osy elge keldim. Qazirgi jumysym – qulpynaı men tańqýraı terý”, – dedi Nurzat.

Hıt ánderdiń avtory 2018 jyldan beri qazaq estradasyna belgili ánshilermen tanysyp, shyǵarmashylyq baılanys ornatqan. Ánderiniń baǵasyn da jasyryp qalmady.

“Ánderimniń bárine avtorlyq quqyq rásimdelgen. Qazaq avtorlar qoǵamynda ánderim tirkelgen. Ánderdiń baǵasy árqalaı, naqty bir soma belgilenbegen. Shamamen bir ándi 50 myń teńgemen 100 myń teńge aralyǵynda satyp alady. Jalpy shyǵarmashylyqta tabys turaqsyz bolǵandyqtan, jalǵyz qalamaqymen elimizde kún kórý múmkin emes. Nesıelerimdi jaýyp, qaryzdarymnan qutylsam, osy jyly kúzde elge qaıtamyn. Shyǵarmashylyqqa bet buramyn dep aıta almaımyn, óleń jazý, án shyǵarý jaı ǵana – hobbı”, – dep aǵynan jaryldy avtor.

Búginde aqynnyń kóptegen ánderin kúlli qazaq jatqa biledi. Tipti, áleýmettik jeliniń arqasynda Shyǵys Azııa elderine de tarap úlgerdi.

“Hıtke aınalǵan “Dostarym meniń zolotoı” degen ándi men jazǵan joqpyn. Keıbir aqparat quraldary qate jazyp jiberipti. Rahymjan Jaqaıymymnyń «Dostarym» degen ánin jazdym. Ekeýi eki bólek án. «18 ben 25» áni YouTube-ta ıýtýbta eń kóp qaralym jınady. 2018 jyly jaryq kórse de, áli kúnge deıin shyrqalady. Sol jyldary 90-jyldardaǵy ánder hıt bolyp turǵan edi. Baǵy janyp, keremet týyndyǵa aınaldy. 2020 jyly “Sen maǵan massyń” degen ándi shyǵardyq. Jaryq kórgen boıda keńinen taraldy. Búginde Qytaı, Taıland sııaqty Shyǵys Azııa elderinde trendtegi ánderdiń biri eken. Odan basqa da kóptegen ánderge sóz jazdym. Anara Batyrhan oryndaıtyn “Qazaqtyń toıy bitpesin”, Gúlmıra Izbashanova oryndap júrgen «Kók Jıgýlı» ániniń qazaqsha nusqadaǵy mátinin jazyp berdim. Abaı Begeıdiń «Quralaı» «Melodııa» degen ánderiniń avtorymyn. 2014 jyly “Al Davaı” degen top bolatyn. Sonyń  «Bıle» «Saǵyndym seni» degen ánderin jazǵanmyn. “Domıno” tobynyń «Gúlbaný» degen áni de meniki. Odan bólek Nursultan Nurberdıev, Ahan Otynshıev, Altynbek Táshimbetov sııaqty «Ýkraına daýysy» jobasynyń fınalısti Dılıara Dıdarmen Alı Oqapovtyń dýet ániniń mátin avtorymyn”, – dedi Nurzat.