«كوكپار» فەدەراتسياسىنىڭ قۇرمەتتى پرەزيدەنتى تانىستىرىلدى

بۇگىن استانادا رەسپۋبليكالىق «كوكپار» فەدەراتسياسىنىڭ كەزەكتەن تىس وتىرىسى ءوتتى. اتالمىش وتىرىسقا قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, رەسپۋبليكالىق «كوكپار» فەدەراتسياسىنىڭ پرەزيدەنتى باۋىرجان يساباەۆ جانە ەلىمىزدىڭ بارلىق وڭىرلەرىندەگى «كوكپار» فەدەراتسياسىنىڭ وكىلدەرى قاتىستى.

جيىندا رەسپۋبليكالىق «كوكپار» فەدەراتسياسىنىڭ قۇرمەتتى پرەزيدەنتى تانىستىرىلدى. فەدەراتسيانىڭ قۇرمەتتى پرەزيدەنتى بولىپ تانىمال كاسىپكەر, قوعام قايراتكەرى, قر پارلامەنت ءماجىلىسىنىڭ دەپۋتاتى ايداربەك قوجانازاروۆ سايلاندى.

وتىرىستا ءسوز العان رەسپۋبليكالىق «كوكپار» فەدەراتسياسىنىڭ پرەزيدەنتى باۋىرجان يساباەۆ كوكپار سپورتىنىڭ قوعامداعى ماڭىزدىلىعىن ايتىپ, الدا جوسپارلانعان جۇمىستارىمەن ءبولىستى.

«كوكپار – ول تەك قانا سپورت رەتىندە ادامنىڭ فيزيكالىق بولمىسىن شىنىقتىرىپ قانا قويمايدى, سونىمەن قاتار, ول – قازاق حالقىنىڭ رۋحانياتىمەن, سالت-داستۇرىمەن بىتە قايناسقان سپورت ءتۇرى. وسى رەتتە ايداربەك اسان ۇلىنىڭ كوكپار سپورتىنا قوساتىن ۇلەسى زور دەپ بىلەمىن. الداعى ۋاقىتتا كوكپار سپورتىن ەلىمىزدىڭ بارلىق وبلىستارىندا جانە حالىقارالىق ارەنالاردا جوعارى دەڭگەيدە دامىتىپ كوتەرەتىنىنە ءشۇبا كەلتىرمەيمىن.

كوكپار سپورتىندا ءالى كۇنگە دەيىن قوردالانعان ماسەلەلەر وتە كوپ. كوكپار ەرەجەسىن قايتا قاراستىرىپ, تولىقتىرۋلار مەن وزگەرىستەر ەنگىزۋ بويىنشا دا اتقارار شارۋالار جەتەرلىك. ءبىز سولاردى قولعا الىپ, ۇلتتىق سپورت قاۋىمداستىعىمەن جۇمىلا جۇمىس اتقاراتىن بولامىز. بارشامىزدىڭ الدىمىزدا ۇلكەن ءبىر ماقسات تۇر. ول –  كەلەر جىلى ەلىمىزدە وتەتىن بەسىنشى دۇنيەجۇزىلىك كوشپەندىلەر ويىندارىن جوعارى دارەجەدە ۇيىمداستىرىپ قانا قويماي, كوكپاردان الەمدە جەتەكشى ەل ەكەنىمىزدى دالەلدەۋىمىز كەرەك» دەدى باۋىرجان ءابدىراشيت ۇلى.

جيىنعا ارنايى قاتىسقان قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ كوكپار سپورتىنداعى ماسەلەلەردى اتاپ, ونىڭ قوعامداعى رولىنە توقتالدى.

«جالپى, كوكپار – قازاقتىڭ بولمىسىنا اينالعان سپورت ءتۇرى ەكەنىن بارشامىز بىلەمىز.

كوكپارسىز قازاقتى, ال, قازاقتى كوكپارسىز ەلەستەتۋ مۇمكىن ەمەس.

سول سەبەپتەن دە كوكپاردىڭ توڭىرەگىندە بولىپ جاتقان بارلىق جاڭالىقتار مەن ماسەلەلەر قوعام نازارىندا تۇرادى.

سوڭعى جىلدارى مەملەكەت باسشىسى قاسىم-جومارت كەمەل ۇلى توقاەۆتىڭ قولداۋىنىڭ ارقاسىندا ەلىمىزدە ۇلتتىق سپورت دامىپ, ونىڭ ناسيحاتى كۇشەيۋدە.

ايداربەك اسان ۇلى وسى كۇنگە دەيىن قوعامدىق – ساياسي قىزمەتپەن قاتار ۇلتتىق سپورتقا دا بەلسەندى قولداۋ كورسەتىپ كەلەدى. ونىڭ ىشىندە كوكپار دا بار. پاتريوتيزم مەن ۇلتتىق ءداستۇردى جاڭعىرتۋدى ءبىرىنشى ورىنعا قوياتىن ايداربەك اسان ۇلى الداعى ۋاقىتتا «كوكپار» فەدەراتسياسىنىڭ جۇمىسىنا تىڭ سەرپىن بەرەرىنە سەنەمىن.

الداعى ۋاقىتتا دا ۇلتتىق سپورت تۇرلەرى قاۋىمداستىعى رەسپۋبليكالىق «كوكپار» فەدەراتسياسىمەن بىرلەسە وتىرىپ جۇيەلى جۇمىستار جۇرگىزەدى.

2024 جىلدىڭ قىركۇيەك ايىندا قازاقستاندا V   دۇنيەجۇزىلىك كوشپەندىلەر ويىندارى وتەدى. بۇل وتە مارتەبەلى بىراق سونىمەن بىرگە جاۋاپتى مىندەت. ونى ەڭ جوعارعى دەڭگەيدە اتقارۋىمىز قاجەت. بۇل حالىقارالىق ءىس-شارانى ۇيىمداستىرۋ مەن وتكىزۋ مەملەكەت باسشىسى قاسىم-جومارت توقاەۆتىڭ تىكەلەي باقىلۋىندا» دەپ مالىمدەدى يسلامبەك تولەۋباي ۇلى.  

جيىن سوڭىندا ءسوز العان «كوكپار» فەدەراتسياسىنىڭ قۇرمەتتى پرەزيدەنتى ايداربەك قوجانازاروۆ مارتەبەلى جانە جاۋاپتى جۇمىسقا كىرىسكەنىنە قۋانىشتى ەكەنىن جەتكىزدى.

«ۇلتتىق سپورت دەسە, ونىڭ ىشىندە كوكپار دەسە ىشكەن اسىمدى جەرگە قوياتىنىمدى بارشاسى بىلەدى. نەگىزگى ماقساتىم – ۇلتتىق سپورتىمىزدى دامىتۋ ارقىلى ۇلتىمىزدىڭ رۋحىن كوتەرۋ, ۇلتىمىزدىڭ ابىرويىن الەمگە پاش ەتۋ. الداعى ۋاقىتتا كوكپار سپورتىنداعى ماسەلەلەردى وڭتايلى شەشۋگە بارلىق كۇش-جىگەرىمدى سالاتىن بولامىن» دەدى قر پارلامەنت ءماجىلىسىنىڭ دەپۋتاتى ايداربەك قوجانازاروۆ.

ايتا كەتەيىك, بۇگىندە ۇلتتىق سپورت قاۋىمداستىعىنىڭ قۇرامىنا 9 فەدەراتسيا كىرەدى. ولار: بايگە, كوكپار, اۋدارىسپاق, تەڭگە ءىلۋ, جامبى اتۋ, اسىق اتۋ, ءداستۇرلى ساداق اتۋ, توعىزقۇمالاق جانە قۇسبەگىلىك.

ال, وتكەن جىلدىڭ قىركۇيەك ايىنان باستاپ قاۋىمداستىق پرەزيدەنتى بولىپ بەلگىلى كاسىپكەر جانە مەتسەنات, Altyn Qyran Foundation قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ سايلانعان بولاتىن.