كوكپەكتى-سامار-ۆاسيلەۆكا تاسجولىنىڭ ءبىر بولىگىن سۋ شايىپ كەتتى

شىعىس قازاقستاندا وبلىستىق ماڭىزداعى كوكپەكتى-سامار-ۆاسيلەۆكا تاسجولىنىڭ ءبىر بولىگىن سۋ شايىپ كەتتى,

قازىر جول قاتىناسىن قالىپقا كەلتىرۋ جۇمىسى ءجۇرىپ جاتىر. وسىعان دەيىن سامار اۋدانىندا قاراوتكەل-كوكجوتا اۋىلى اراسىن دا سۋ باسىپ قالعان ەدى. قازىر ول باعىتتاعى جول اشىلدى. جالپى اۋداندا قارعىن سۋدان ەلدى مەكەندەرگە قاۋىپ ءتونىپ تۇرعان جوق. مۇنداعى لايلى سۋ قويماسى دا شتاتتىق رەجىمدە جۇمىس ىستەپ تۇر. كوكپەكتى-سامار-ۆاسيلەۆكا باعىتىنداعى جول ەكى اۋداندى جانە شىعىس قازاقستان مەن اباي وبلىسىن بايلانىستىرادى. جولدىڭ قازىرگى جاعدايى وسىنداي. مۇنداعى ديامەترى 1,5 مەترلىك قۇبىردىڭ سۋدى وتكىزۋگە قۋاتى جەتپەي قالدى.

قارعىن سۋ جول جابىنىن شايىپ كەتتى. قازىر جۇمىسشىلار بريگاداسى ۋچاسكەنى جوندەپ جاتىر. مۇرات مۇحامەتجانوۆ, سامار اۋدانى اكىمىنىڭ ورىنباسارى: — سۋ وتكىزەتىن سۋ قۇبىرى كوپ قار سۋى كەلگەنگە توتەپ بەرە الماعاندىقتان, جول شايىلىپ كەتتى. بۇگىنگى كۇنى قالىپتاستىرۋ جۇمىستارى جۇرگىزىلىپ جاتىر. جۋىق ارادا جول قاتىناسى قايتا اشىلىپ, جالعاسادى. اۋىلدارعا توپان سۋدان ازەر قاتەر ءتونىپ تۇرعان جوق دەيدى, – ماماندار. دەگەنمەن ەل ىرگەدەگى لايلى سۋ قويماسىنان قاۋىپتەنىپ وتىر. ەلميرا احمەتوۆا, ءتىلشى: — بۇل – ەل شىعىسىنداعى ەڭ قاۋىپتى «لايلى» سۋ قويماسى. اۋماعىنا 770 000 تەكشە مەتر سۋ سىيادى. نەگە قاۋىپتى دەسەڭىز, سۋ قويماسىنىڭ ءداپ ەتەگىندە ءبۇتىن ءبىر سامار اۋىلى تۇر. وسىدان 14 جىل بۇرىن جويقىن تاسقىن بولىپ بوگەتتى بۇزىپ, وسى اۋىلدى سۋ شايىپ كەتكەن ەدى. بيىلعى جاعداي تۇراقتى, – دەيدى ماماندار. ويتكەنى جان-جاقتان جينالعان قار سۋى اقىرىنداپ تومەنگى سۋاعارلارمەن ءوتىپ جاتىر. قازىر سۋ قويماسى سۋعا تولدى. بىراق شەكتىك مولشەردەن اسقان جوق. شتاتتىق رەجىمدە جۇمىس ىستەپ تۇر.

دەگەنمەن ارقانى كەڭگە سالۋعا بولمايدى. سوندىقتان قۇتقارۋشىلار دا, اتقارۋشى ورگان دا كەز كەلگەن جاعدايعا دايىن تۇر. اسەت سەيىلقۇماروۆ, سامار اۋدانى تجب باستىعى: — قازىرگى ۋاقىتقا قاۋىپ تولىق جوق دەپ ايتۋعا بولمايدى, ساي-سايدىڭ ءىشى, تاۋلاردىڭ بارىندە ءالى وتە كوپ قار جاتىر, قازىرگى ۋاقىتقا قاردىڭ بيىكتىگى – 40 مم, ال قازگيدرومەت مالىمەتى بويىنشا جەردىڭ قاتۋى – 63 سم. سامار اۋىلىندا 6 مىڭعا جۋىق ادام تۇرادى. لايلى وزەنى اۋىل ىشىنەن وتەدى. ارناسى اشىق. 12 شاقىرىم ارىق تازالانىپ, سۋ وتكىزۋ قۇبىرلارى دا قالىپقا كەلتىرىلدى. ينەرتتى ماتەريالدار دا دايىن. ماماندار كۇن كۇرت جىلىنىپ كەتۋى مۇمكىن دەپ الاڭداۋلى. مارات ءدۇسىپوۆ, سامار اۋىلدىق وكرۋگىنىڭ اكىمى: — اۋا رايى دا قولايسىز بوپ تۇر, كۇندىز دە جىلى, تۇندە دە اياز جوق, مىنە, پليۋس 2 بولىپ تۇر قازىرگى تاڭدا, بۇل قاۋىپتى كۇشەيتە تۇسەدى. مۇندا تاسقىن بولا قالعان جاعدايدا 300-گە جۋىق ادامدى قاۋىپسىز جەرگە كوشىرە الادى. ول ءۇشىن ءبىلىم وشاقتارى مەن كوللەدج جاتاقحاناسى جابدىقتالعان.