كوكشەتاۋدا ناۋقاستىڭ اتا-اناسى دارىگەرلەرگە شابۋىل جاسادى

فوتو: ۆيدەودان كادر

اقمولا وبلىسىندا اۋرۋحاناعا جەتكىزىلگەن 3 جاستاعى بالانىڭ اتا-اناسى مەديتسينا قىزمەتكەرلەرىنە شابۋىل جاسادى. وقىس جاعداي سەنبى كۇنى مەديتسينا مەكەمەسىنىڭ جانساقتاۋ بولىمىندە بولعان, دەپ حابارلايدى qandastar.kz اقپارات پورتالى Nayza Kokshe پاراقشاسىنا سىلتەمە جاساپ حابارلايدى.

18 قاڭتار كۇنى ساعات 16:00 شاماسىندا 3 جاستاعى بالا قانسىراپ جاتقان كۇيدە اۋرۋحاناعا جەتكىزىلدى. اتا-اناسىنىڭ ايتۋىنشا, ۇيدە بالانىڭ ۇستىنە الاسا شكاف قۇلاپ كەتكەن. جاعدايدىڭ قالاي بولعانى بەلگىسىز, بىراق بالانىڭ ءۇش ساۋساعى جانشىلىپ, تەرىنىڭ جىرتىلعان جەرىنەن تىرناعى سالبىراپ قالعان.

“اتا-اناسىنىڭ ايتۋىنشا, بالانىڭ ءۇش ساۋساعى شكافتىڭ استىندا قالىپ قويعان. ساۋساق ۇگىلىپ, تەرىسى الىنىپ قالعان. كەسىلگەن ساۋساقتاردى قالپىنا كەلتىرۋ تەحنيكالىق تۇرعىدان مۇمكىن ەمەس ەدى. گانگرەنانىڭ الدىن الۋ ءۇشىن جانشىلىپ قالعان ءۇش ساۋساقتىڭ ۇشىن امپۋتاتسيالاۋ كەرەك بولدى”, – دەيدى تراۆماتولوگ دارىگەر مەيرام دۇيسەكەەۆ.

دارىگەرلەر بالانىڭ اتا-اناسىنا امپۋتاتسيا جاسالاتىنى تۋرالى ەسكەرتكەن. الايدا ولار مۇنى قابىلداۋدان باس تارتقان. اناسى دارىگەرمەن ءسوز تالاستىرىپ, سوڭىندا پەرنەتاقتاسىن لاقتىرىپ, قاعازدارىن شاشىپ كەتكەن.

بالاعا شۇعىل وتا جاساۋ ءۇشىن انەستەزيولوگ ەلامان تاجەنوۆ شاقىرىلعان. وتاعا بارا جاتقان انەستەزيولوگتى بالانىڭ اكە-شەشەسى ۇستاپ الىپ, بالاعاتتاپ, قورلاي باستاعان. تاجەنوۆتىڭ ايتۋىنشا, بالانىڭ اتا-اناسىنان وتا كەزىندە ناركوز قولدانۋعا رۇقسات العان. وتا اياقتالعان سوڭ انەستەزيولوگ ەلامان تاجەنوۆ ەرلى-زايىپتىنى شاقىرىپ الىپ, ولارعا ناركوزدان كەيىن بالاعا قانداي كۇتىم جاساۋ كەرەگىن تۇسىندىرۋگە تىرىسقان. الايدا ەرلى-زايىپتى دارىگەردىڭ سوزدەرىن قۇلاعىنا دا ىلمەگەن.

“ولار ەكى رەت جانساقتاۋ بولىمىنە باسىپ كىردى. ولاردى كورگەن بالا, ارينە جىلادى. ەرلى-زايىپتى اۋرۋحانانى باسىنا كوتەرىپ, ايعايلاپ, جانساقتاۋ ءبولىمىنىڭ ەسىگىن سىندىردى, مەيىرگەرلەردى يتەرگەن. ايەل ماعان شابۋىل جاساپ, كەۋدەمنەن ۇردى”, – دەيدى ەلامان تاجەنوۆ.

اۋرۋحانادا شۋ شىعارعان ەرلى-زايىپتىنى ينسپەكتور دا ساباسىنا تۇسىرە الماعان. كەيىن مەديتسينا قىزمەتكەرلەرى پوليتسيا شاقىرۋعا ءماجبۇر بولدى.

دارىگەرلەر بالانى پالاتاعا اۋىستىرىپ, ەرلى-زايىپتىنىڭ ۇستىنەن شاعىم تۇسىرگەن.