«قوقىس شىعارۋ, نەكە كۋالىگى مەن قوماقتى اقشا»: الماتىدا سۋديا 75 ميلليون تەڭگە پارا العان شەندىگە جەڭىل جازا تاعايىنداعان

فوتو: Stan.kz/ChatGPT ارقىلى جاسالدى

الماتىدا سۋديا 75 ميلليون تەڭگە پارا العان باسشىعا جەڭىل جازا تاعايىنداعان. ال قىزمەت بابىن اسىرا پايدالاندى دەلىنگەن يزولياتور باستىعىن 6 جىلعا, 35 مىڭ تەڭگە پارا العان اجەنى 3 جىلعا سوتتاپ جىبەرگەن. بۇل تۋرالى Stan.kzاقپارات اگەنتتىگى حابارلايدى.

ءبارى نەدەن باستالدى?

الماتىنىڭ تۇركسىب اۋداندىق سوتىندا قىلمىستىق-اتقارۋ جۇيەسى دەپارتامەنتى تەرگەۋ يزولياتورى باستىعىنىڭ ەكس-ورىنباسارى رينات احمەتجانوۆتىڭ قىلمىستىق ءىسى قارالدى.

جۋرناليست ميحايل كوزاچكوۆتىڭ مالىمەتىنشە, 45 جاستاعى رينات احمەتجانوۆ 2024 جىلدىڭ 1 ماۋسىمىنان باستاپ قىلمىستىق-اتقارۋ جۇيەسى دەپارتامەنتى №72 مەكەمەسىندە باسشىنىڭ مىندەتىن اتقارۋشى قىزمەتىندە بولعان. ال 16-18 مامىر ارالىعىندا مەكەمەنىڭ رەجيم جانە قاۋىپسىزدىك بويىنشا ورىنباسارى بولىپ, ءتارتىپ پەن قاۋىپسىزدىككە جاۋاپتى بولعان.

№72 مەكەمە تەرگەۋ يزولياتورى سانالادى. وندا كۇدىكتىلەرگە تەرگەۋ جۇرگىزىلىپ, قاماۋعا الىنادى. ءبىر كۇنى بۇل مەكەمە اينالاسىنان جاعىمسىز ءيىس شىعادى. ول نىسان اينالاسىنا جينالعان قوقىستان شىققان.

“وتكەن جىلى مەكەمەدەن قوقىس ءيىسى شىعا باستاعان. مەكەمە جەكە كومپانيامەن قوقىس شىعارۋ بويىنشا كەلىسىم-شارت جاساسقان. الايدا سەرىكتەستىك ءوز مىندەتتەمەلەرىن ورىنداۋدان باس تارتقان. سونىڭ سالدارىنان ءبىر اي بويى جينالىپ قالعان قوقىس جاڭبىرمەن ارالاسىپ, ودان كەيىن كۇنگە كۇيىپ جاتا بەرگەن. ۋاقىت وتە كەلە ونى جەكە ادامدارعا شىعارۋعا تۋرا كەلگەن. سوسىن اۋماققا جۇك كوتەرگىش پەن ەكى كاماز جىبەرىلگەن. ال بۇل مىندەتتى جازاسىن وتەپ جاتقان سوتتالۋشى ۇيىمداستىرعان”, – دەلىنگەن جۋرناليست جازباسىندا.

مالىمەتكە سايكەس, ۇكىم شىعارىلعاننان كەيىن تەرگەۋ يزولياتورىندا قالاتىن سوتتالعاندار ساناتى بار. ادەتتە مۇندا كىشىگىرىم قىلمىس ءۇشىن ءبىر-ەكى جىل العاندار قالادى. يزولياتوردا ولار اۋىر جۇمىس ىستەيدى. ولاردى “شارۋاشىلىق قاراقشىسى” دەپ اتايدى.

“قوقىس شىعارۋ مىندەتىن موينىنا العان “دەنساۋلىققا قاساقانا اۋىر زيان كەلتىرگەنى ءۇشىن” سوتتالعان “شارۋاشىلىق قاراقشىسى” ازامات قۇدايقۇلوۆ. ول سىرتتان تانىس كاماز جۇرگىزۋشىلەرىن تاپقان. ال قوقىستى شىعارۋ شىعىنىن سوتتالۋشىعا اناسى مەن ايەلى جىبەرگەن”, –دەلىنگەن مالىمەتتە.

تەرگەۋشىلەردىڭ ايتۋىنشا, احمەتجانوۆ قۇدايقۇلوۆتى قوقىس شىعارۋدى ءوز موينىنا الۋعا ماجبۇرلەگەن. قۇدايقۇلوۆتىڭ ءوزى مۇنى راستاپ, باسشى قوقىس شىعارماساڭ, ءتۇرلى ماسەلەلەرگە تاپ بولاسىڭ دەپ ايتقانىن جەتكىزدى. دەگەنمەن احمەتجانوۆ مۇنداي بۇيرىق بەرمەگەنىن, قوقىس شىعارۋ ءوز مىندەتىنە كىرمەيتىنىن جەتكىزدى.

“ايىپتالۋشى رينات احمەتجانوۆ قىلمىستىق كودەكستىڭ 362-بابىنىڭ 4-بولىگى (بيلىكتى نەمەسە لاۋازىمدىق وكىلەتتىكتەردى اسىرا پايدالانۋ) بويىنشا كىنالى دەپ تانىلدى. ول التى جىلعا جالپى رەجيمدەگى كولونياعا سوتتالدى. سونىمەن قاتار احمەتجانوۆ ادىلەت پودپولكوۆنيگى اتاعىنان ايىرىلىدى. ەندى ول ءومىر بويىنا مەملەكەتتىك قىزمەتتە جانە كۆازيمەملەكەتتىك سەكتوردا لاۋازىم يەلەنە المايدى. احمەتجانوۆتان جابىرلەنۋشىلەرگە 20 اەك وتەماقى جانە ءىس جۇرگىزۋ شىعىندارىن جابۋ ءۇشىن 117 374 تەڭگە ءوندىرىپ الىندى”, – دەلىنگەن حابارلامادا.

باپتىڭ سانكتسياسىندا 5 جىلدان 10 جىلعا دەيىن جازا قاراستىرىلعان, سوندىقتان 6 جىل ورتاشا مەرزىم سانالادى

ەندى جاسالعان قىلمىستار مەن ولارعا بەرىلگەن جازانى سالىستىرىپ كورسەك

ماسەلەن «الماتى سۋ» مەملەكەتتىك كاسىپورنىنىڭ توپ-مەنەدجەرى 37 جاستاعى ماقسات جولدىباەۆ 75 ميلليون تەڭگە پارا العان. ودان بولەك 345 ميلليون تەڭگە الدىن الا تولەم بولعان. ول «قالانىڭ كارىز جانە سۋمەن جابدىقتاۋ جۇيەلەرىن كۇردەلى جوندەۋگە مەملەكەتتىك ساتىپ الۋ شارتتارى بويىنشا جۇمىستاردىڭ اياقتالعانى تۋرالى جانە بيۋدجەت قاراجاتىنىڭ اۋدارىلعانى تۋرالى اكتىلەرگە كەدەرگىسىز قول قويامىن» دەگەن جەلەۋمەن كاسىپكەردەن 75 ميلليون تەڭگە پارا الماق بولعان.

فوتو: انتيكور

ونىڭ ءىسى بيىل 9 قاڭتاردا الماتى قالاسى بوستاندىق اۋداندىق سوتىندا قارالدى. ناتيجەسىندە ونىڭ ارەكەتى الاياقتىق رەتىندە سارالانىپ, ول 5 جىلعا شارتتى تۇردە باس بوستاندىعىنان ايىرىلدى. الايدا ۇكىم تۋرالى شۋ شىققاننان كەيىن الماتى قالالىق سوتى شارتتى جازانى ناقتى جازاعا اۋىستىردى.

ء«باسپاسوز بەتتەرىندە جولدىباەۆ 5 جىل شارتتى جازاعا كەسىلدى دەگەن اقپارات تارادى. الايدا ول كاسىپكەرلەردەن 75 ملن تەڭگە پارا الماق بولدى دەگەن كۇدىككە ىلىنگەن. وسىعان وراي پروكۋراتۋرا شاعىمى بويىنشا اپپەلياتسيالىق شەشىم شىعىپ, ۇكىم 5 جىلعا باس بوستاندىعىنان ايىرۋ جازاسىنا اۋىستىرىلىپ, ول سوت زالىندا قاماۋعا الىندى», – دەلىنگەن حابارلامادا.

دەگەنمەن بۇل پارا الماعان رينات احمەتجانوۆقا بەرىلگەن 6 جىلدان الدەقايدا از.

جۋرناليست ميحايل كوزاچكوۆتىڭ مالىمەتىنشە, احمەتجانوۆقا ۇكىم شىعارعان تۇركسىب اۋداندىق سوتىنىڭ سۋدياسى عاني امانتاي ۇلى 35 مىڭ تەڭگە پارا العان 59 جاستاعى ايەلدى 3 جىلعا باس بوستاندىعىنان ايىرعان. 

سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە, جاميلا سىرايلوۆا احاج بولىمىندە جۇمىس ىستەپ, نەكە كۋالىگىن بەرۋمەن اينالىسقان. وعان شەتەلدىك ازاماتقا تۇرمىسقا شىعىپ جاتقان ايەل كەلىپ, قۇجاتتى تەز جاساپ بەرۋدى سۇراعان. سىرايلوۆا  قۇجاتتى 15 جۇمىس كۇنىنەن كەيىن عانا بەرە الاتىنىن ايتقان. الايدا 35 مىڭ تەڭگە تولەسە جۇمىستى جەدەلدەتۋگە بولاتىنىن جەتكىزگەن. قالىڭدىق مۇنى سىبايلاس جەمقورلىققا قارسى ءىس-قيمىل اگەنتتىگىنە حابارلاپ, ولارمەن بىرلەسە ارەكەت ەتكەن. ول 35 مىڭ تەڭگەنى سىرايلوۆانىڭ ەسەپشوتىنا اۋدارعان. وسىلايشا سىرايلوۆانىڭ ارەكەتى مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن تۇلعا جاساعان الاياقتىق دەپ سارالاندى.

سۋديا امانتاي ۇلى ونى 3 جىلعا سوتتادى. ۇكىم زاڭدى كۇشىنە ەنگەن جوق. 59 جاستاعى سىرايلوۆا 35 مىڭ تەڭگەنى قالىڭدىققا اۋدارىپ, ءوز كىناسىن مويىنداعان. دەسە دە سۋديا مۇنى ەسكەرمەگەن. مۇنى 75 ميلليون تەڭگە پارا الىپ, 5 جىلعا باس بوستاندىعىنان ايىرىلعان ماقسات جولدىباەۆتىڭ ىسىمەن سالىستىرساق…

اتالعان جاعدايعا قاتىستى Stan.kz تىلشىسى الماتى قالالىق سوتىنان پىكىر سۇراپ ءبىلدى.

سوت مالىمەتىنشە, بۇل ءىس تۇركسىب اۋداندىق سوتىندا قارالعان.

“باس بوستاندىعىنان ايىرۋ تۋرالى جازا تاعايىندالعان. تاراپتاردان اپەللياتسيالىق  شاعىم تۇسىرىلگەن. ول اپەللياتسيالىق ساتىدا قارالىپ, باس بوستاندىعىنان ايىرۋ جازاسى ايىپپۇلعا وزگەرتىلگەن”, – دەلىنگەن حابارلامادا.