Jańalyqtar
Kól qurylys qaldyǵymen kómilip, turǵyndar dabyl qaǵýda: Astana ákimdigi nege únsiz?
Foto: sn.kz
Tıisti memlekettik organdar bul jaǵdaıǵa kóz juma qarap otyr, dep jazady qandastar.kz
Najımedenov kóshesi, 64 mekenjaıy mańyndaǵy turǵyndar ekologııalyq másele jóninde dabyl qaǵýda. Olardyń aıtýynsha, bul aýdandaǵy shaǵyn kól men birneshe toǵan qurylys jáne turmystyq qaldyqtarmen kómilip jatyr, dep habarlaıdy Skifnews.kz aqparat portaly.
«Najımedenov kóshesi, 64 mekenjaıyndaǵy shaǵyn kóldi kómip jatyr. Bul aýmaqta birneshe kishigirim kólder men toǵandar bar edi – bárin qurylys jáne turmystyq qaldyqtarmen kómip jatyr», – delingen turǵyndardyń habarlamasynda.
Turǵyndardyń aıtýynsha, dál osy aýmaq Prezıdenttiń tapsyrmasymen josparlanǵan «Myńjyldyq alleıasy» jobasyna enýi tıis bolǵan. Alaıda tıisti memlekettik organdar bul jaǵdaıǵa kóz juma qarap otyr.
«Ákimdik te, sanıtarlyq-epıdemıologııalyq qyzmet te áreket etpeı otyr. Memleket tarapynan tolyq nemquraıdylyq baıqalady», – deıdi jergilikti halyq.
Alańdaýly turǵyndar tabıǵı ortany saqtap qalý úshin shuǵyl sharalar qabyldaýdy jáne jaýapty organdardyń aralasýyn talap etedi.
