جاڭالىقتار
قولدانىستاعى سۋ كودەكسىنە 272 تۇزەتۋ ەنگىزىلدى
فوتو:سۋ رەسۋرستارى جانە يرريگاتسيا مينيسترلىگى
قولدانىستاعى سۋ كودەكسىنە 272 تۇزەتۋ ەنگىزىلدى, دەپ جازدى qandastar.kz
الايدا سالا ساراپشىسى ءامىرحان كەنشىموۆتىڭ سوزىنشە, كوپتەگەن نورمالار دەكلاراتيۆتى, كەي نورمالار قايتالانادى جانە لوگيكالىق تۇرعىدا سايكەس كەلمەيدى. سوندىقتان جاڭا سۋ كودەكسىن قابىلداۋ قاجەت دەگەن پىكىردە.
«2003 جىلى قابىلدانعان سۋ كودەكسى سول كەزدەگى سۋ ساياساتى مەن ەكونوميكالىق جاعدايدى نازارعا الا وتىرىپ جاسالدى. سول سەبەپتى كليماتتىق وزگەرىستەر ورىن الىپ جاتقان قازىرگى زامان سۇرانىسىنا ساي ەمەس. جاڭا رەداكتسيادا كودەكس نورمالارى جۇيەلەنىپ, سۋ رەسۋرستارىن ۇنەمدەۋگە جانە ونى قورعاۋعا باسىمدىق بەرىلەدى. ماسەلەن, باسسەيندىك ينسپەكتسيالارعا مەملەكەتتىك باقىلاۋ فۋنكتسيالارىمەن قاتار تەرگەۋ فۋنكتسيالارى دا بەرىلىپ وتىر. بۇل سۋدى زاڭسىز پايدالانۋشىلارمەن كۇرەستى كۇشەيتۋگە مۇمكىندىك بەرەدى», – دەدى ينجەنەر-گيدروتەحنيك ءامىرحان كەنشىموۆ.
سۋ رەسۋرستارى جانە يرريگاتسيا مينيسترلىگى ازىرلەگەن جاڭا سۋ كودەكسىنىڭ جوباسىن ءماجىلىس دەپۋتاتتارى ءبىرىنشى وقىلىمدا ءبىراۋىزدان ماقۇلدادى. قۇجات كليماتتىڭ وزگەرۋىنە بەيىمدەلۋگە جانە سۋ ۇنەمدەۋ پرينتسيپتەرىن ەنگىزۋگە ايرىقشا نازار اۋدارادى. العاش رەت سۋ نىساندارىن سارقىلۋدان جانە باسقا دا جاعىمسىز سالداردان قورعايتىن «ەكولوگيالىق اعىن» ۇعىمى ەنگىزىلەدى. سونداي-اق, شاعىن كولدەردى, وزەندەر مەن توعانداردى, مۇزدىقتار مەن سۋلى-باتپاقتى ايماقتاردى قورعاۋ جونىندە نورمالار ەنگىزىلدى.
