«Kóligimdi alyp ketti»: Qazaqstandyqtar Qytaı kólikterin jetkizýshige shaǵymdandy

Foto: ashyq derekkóz

Almaty, Astana jáne Shymkentten kelgen 16 júrgizýshi alaıaqtardyń qurbany bolǵanyn aıtyp, shaǵymdandy. Olar ınternettegi jarnamaǵa senip, alǵashqy tólem jasap, kólikti keıinnen satyp alý quqyǵymen jalǵa almaq bolǵan, dep jazdy qandastar.kz

Alaıda kóp uzamaı olardyń sý jańa kóligin sot oryndaýshy tárkilegen. О́ıtkeni kólikter bank kepildiginde bolǵan. Bul týraly Stan.kz aqparat agenttigi «KTK» arnasyna silteme jasap habarlaıdy.

Kólikti bolamyn dep júrip aldanyp qalǵan qazaqstandyqardyń aıtýynsha, jeke menshik ıesi olarǵa jańa kólikterdi tıimdi baǵamen ári bólip tóleý shartymen satýǵa ýáde etken. Oǵan senip qalǵandar aqshasyz da, kóliksiz de qalyp otyr.

«Jumystan qaıtyp kele jatyr edim, kóligim óship qaldy. Sol jerge kompanııa ókilderi men sot oryndaýshylary keldi. Sóıtsem kólikke GPS ornatylǵan eken. Sol arqyly kórip otyrǵan. Kóligimdi alyp ketti. Dırektorǵa jazyp, aqshamdy qaıtarýdy talap ettim, eshqandaı nátıje joq», – deıdi Berik Asanuly.

Sóıtse satýshy bankke qomaqty aqsha qaryz bolǵan. Al bankten aqsha alý úshin kólikterdi kepilge qoıǵan. Bul jaıtty tutynýshylar kólikteri tárkilengennen keıin ǵana bilgen. Aldanǵan satyp alýshylar kúdikti áli bostandyqta júrgenin jáne Qytaı kólikterin satyp jatqanyn aıtady.

«Árkimniń jaǵdaıy ártúrli: biri qara tizimde. Bul kólik bireýler úshin kúnkóris kózi deýge bolady. Olar bárinen alyp qoıdy, jalpy aıtqanda júzden astam kólik, ózderine jınap qoıyp, qazir eshkimge bermeı otyr. Aýylsharýashylyǵymen aınalysatyndyqtan, kólik maǵan jumysqa qajet, sondyqtan maǵan krossover qajet bolyp edi», – deıdi Muhıt Kývatov.

Júrgizýshilerdiń kóbi kóliktiń qaryzyn tolyqtaı derlik ótep úlgergen. Satyp alýshylar ujymdyq aryzben polıııaǵa shaǵymdandy. Polıııa alaıaqtyq isi boıynsha qylmystyq is qozǵalǵanyn málimdedi.

«Qazir «Birneshe ret jasalǵan alaıaqtyq» babymen qozǵalǵan qylmystyq is boıynsha 16 adam jábirlenýshi retinde tanyldy. Dál sonsha adam resmı aryzben júgindi. Tıisti saraptamalyq zertteý taǵaıyndaldy, sonyń ishinde taraptar arasynda jasalǵan qujatty zertteý de bar. Tergeý amaldary júrgizilip jatyr, bul isti tolyq, jan-jaqty, obektıvti zertteýge jáne qylmystyq is boıynsha sheshim qabyldaýǵa múmkindik beredi», – dep málimdedi Almaty polıııa departamentiniń resmı ókili Saltanat Ázirbek.

Kúdikti baılanysqa shyqpady. Qazir onyń qaıda júrgenin aldanyp qalǵan klıentteri de bilmeıdi. Eger kúdiktiniń kinási dáleldense, ol jeti jylǵa deıin bas bostandyǵynan aıyrylýy múmkin.