«كولىك تە, اقشا دا جوق»: قىزىلوردادا وتىزعا جۋىق ادامدى اۆتوسالون الداپ كەتكەن

فوتو: سيۋجەت كادرلارىنان

قىزىلوردادا كولىكتەرىن اۆتوسالونعا ساتقان وتىزعا جۋىق ادام كومپانيانىڭ الداپ كەتكەنىن ايتىپ باس كوتەردى. سوزدەرىنشە اۆتوسالوننىڭ يەلەرى «كولىكتى قىمبات باعاعا الامىز, 14 كۇننەن كەيىن اقشاسى تۇسەدى» دەپ كەلىسىمشارت جاساسقان. الايدا كەيىن كولىك تە, اقشا دا جوق ەكەن. بۇل تۋرالى Stan.kz اقپارات اگەنتتىگى 31 ارنانىڭ «ينفورمبيۋرو» جاڭالىقتار باعدارلاماسىنا سىلتەمە جاساپ حابارلايدى.

بۇل ازاماتتار اۆتوسالونىنىڭ باسشىلارى ءبىزدى الداپ كەتتى دەپ اشۋلى. ايتۋلارىنشا, الدىمەن ولار كولىكتەرىن تانىمال سايت ارقىلى ساۋداعا شىعارعان. كەيىن كومپانيا قىزمەتكەرلەرى حابارلاسىپ, جارناماداعى تەمىر تۇلپاردى قىمبات باعامەن الامىز دەپ شاقىرعان. ونىڭ ۇستىنە كولىكتىڭ اقىسى 14 كۇننەن كەيىن تولەنەدى دەگەن كەلىسىمشارت جاساسقان.

«ەندى ەكى اپتا ءبىتىپ, اراسىندا ءبىر كەلىپ كورىپ كەتكەم. سول كەزدە كولىك تۇرعان. ەندى قايتىپ 14 كۇننەن كەيىن كەلسە كولىك تە جوق, اقشا دا جوق. ساتىلىپ كەتكەن. مىناداي ادامعا قالاي ليتسەنزيا بەرىپ وتىر كولىك ساتۋعا. الاياقتىق مىناۋ تازا», – دەدى قىزىلوردا قالاسىنىڭ تۇرعىنى جالمۇرزاەۆ المادۋللا.

تۇرعىندار اۆتوسالونعا اكەلىپ وتكىزگەن كولىكتەرىمىز باسقا ازاماتتارعا ساتىلىپ كەتكەن دەپ قىنجىلادى. كازىر 30-عا جۋىق ادام نە كولىگىن, نە اقشاسىن الا الماي ءجۇر.

«بارلىعى 30-عا جۋىق كولىك بار شىعار. ول مەنىڭ بىلەتىنىم. ەندى مىنە جاۋىپ كەتكەن. ەشكىم تاپپايدى. نە زاڭ قىزمەتكەرى تاپپايدى, نە ءوزىمىز ىزدەپ تابا الماي ءجۇرمىز», – دەدى قىزىلوردا قالاسىنىڭ تۇرعىنى قايروللا تابىكابىلوۆ.

كولىكتىڭ اقىسىن انە-مىنە تولەيمىز دەپ سەندىرىپ كەلگەن كومپانيا باسشىلارى ءبىر اپتادان بەرى ءىزىم-قايىم جوعالعان. ۇيالى تەلەفوندارى ءسوندىرۋلى, ال سالوننىڭ ەسىگىنە ق ۇلىپ سالىنعان ەكەن. سان سوققان كوپشىلىك قۇزىرلى ورگاندارعا ارىزدانۋعا ءماجبۇر بولىپتى. پوليتسيا الاياقتىق بابىمەن تەرگەۋدى باستاعان.

«اتالعان دەرەك بويىنشا پوليتسيا باسقارماسىمەن 190-بابى 3-بولىگىنە سايكەس قىلمىستىق ءىس تىركەلىپ, قازىرگى تاڭدا تەرگەپ-تەكسەرۋ امالدارى جۇرگىزىلۋدە. اتالعان قىلمىستىق ءىس باسقارما باستىعىنىڭ قاتاڭ باقىلاۋىندا», – دەدى قىزىلوردا قالالىق پوليتسيا باسقارماسى ءبولىم باسشىسىنىڭ ورىنباسارى تالانت قازبەك.