جاڭالىقتار
كولىك ۆيتسە-ءمينيسترى ءساتجان ابلاليەۆ ۇستالدى – باق
فوتو: كولىك مينيسترلىگى
كولىك ۆيتسە-ءمينيسترى ءساتجان ابلاليەۆتىڭ ۇستالعانى تۋرالى اقپارات تارادى, دەپ جازدى qandastar.kz
بۇل تۋرالىStan.kz اقپارات اگەنتتىگى حابارلايدى.
KazTag پورتالىنىڭ مالىمەتىنشە, شەنەۋنىك 78 مىڭ دوللارى كولەمىندە پارا العان دەگەن كۇدىككە ءىلىندى. بولجام بويىنشا, ول قاراجاتتى ۇلىنىڭ ۇلىبريتانياداعى وقۋىنا جانە ءجۇرىپ-تۇرۋىنا اۋدارعان.
بىراق ازىرگە رەسمي تۇسىنىكتەمە بەرىلمەدى.
الايدا قۇقىق قورعاۋ ورگاندارىنداعى دەرەككوز مۇنىڭ راس ەكەنىن ايتقان.
ءساتجان ابلاليەۆ 2023 جىلعى قازان ايىنان بەرى كولىك ۆيتسە-ءمينيسترى قىزمەتىن اتقارىپ كەلەدى.
شەنەۋنىك اتىراۋ وبلىسى جىلىوي اۋدانىنا قاراستى بيىكجال اۋىلىندا دۇنيەگە كەلگەن. ول الماتى اۆتوموبيل-جول ينستيتۋتىن جانە قازاق كولىك جانە كوممۋنيكاتسيالار ۋنيۆەرسيتەتىن ءتامامداپ, ەكى ماماندىق — ينجەنەر-قۇرىلىسشى جانە ينجەنەر-ەكونوميست بويىنشا ءبىلىم العان.
ەڭبەك جولىن 1987 جىلى وڭتۇستىك ەمبى مۇنايبارلاۋ ەكسپەديتسياسىنىڭ ورتالىق ينجەنەرلىك-تەحنيكالىق قىزمەتىندە وپەراتور-كوللەكتور بولىپ باستاعان.
1996–2004 جىلدار ارالىعىندا ءساتجان ابلاليەۆ قازاق كولىك جانە كوممۋنيكاتسيالار اكادەمياسىندا قىزمەت ەتىپ, وقىتۋشىدان باستاپ وقۋ باعىتتارىن باسقارۋشىعا دەيىن جەتتى.
2004 جىلدان 2011 جىلعا دەيىن كولىك جانە كوممۋنيكاتسيالار مينيسترلىگىنىڭ اۆتوموبيل جولدارى جانە ينفراقۇرىلىمدىق كەشەن قۇرىلىسى كوميتەتىندە بىرقاتار جاۋاپتى لاۋازىمدارا بولعان. وسى كەزەڭدە ول باعا بەلگىلەۋ مەن جوبالاۋ ادىستەمەسى بولىمىنە, قۇرىلىس جانە قايتا جاڭعىرتۋ باسقارماسىنا, سونداي-اق سىرتقى قارىزدار مەن كونتسەسسيالىق جوبالار باسقارماسىنا جەتەكشىلىك ەتتى. سونىمەن قاتار قازاقستان جولشىلارى قاۋىمداستىعىن باسقاردى.
2012–2021 جىلدارى اۆتوموبيل جولدارى كوميتەتى توراعاسىنىڭ ورىنباسارى قىزمەتىن اتقاردى. ال 2021 جىلدان 2023 جىلعا دەيىن سولتۇستىك قازاقستان وبلىسى اكىمىنىڭ ورىنباسارى بولدى. 2023 جىلدىڭ قازان ايىندا كولىك ۆيتسە-ءمينيسترى لاۋازىمىنا تاعايىندالدى.
