الەۋمەت جانە قوعام
كولىكتى 5 مينۋتتان ارتىق قىزدىرعانى ءۇشىن ايىپپۇل سالۋ زاڭدا جوق – دەپۋتات
فوتو: تەنگرينيۋس
كولىكتى 5 مينۋتتان ارتىق قىزدىرعانى ءۇشىن ايىپپۇل سالۋ زاڭدا جوق بولىپ شىقتى, دەپ حابارلايدى qandastar.kz ۇلىسمەدياعا سىلتەپ.
كولىكتى بەس مينۋتتان ارتىق قىزدىرۋعا زاڭدا تىيىم سالىنباعان. بۇل تۋرالى ءماجىلىس دەپۋتاتى, زاڭناما جانە سوت-قۇقىقتىق رەفورما كوميتەتىنىڭ مۇشەسى باقىتجان بازاربەك مالىمدەدى. ول كوميتەت ءتيىستى تۇزەتۋلەر ەنگىزگەنىن, وعان سايكەس وسىنداي نورمالاردى جەرگىلىكتى وكىلدى ورگاندار – ءماسليحاتتار بەكىتە الاتىنىن اتاپ ءوتتى.
– سىزدەر (مەملەكەتتىك ورگاندار) زاڭدا “بەس مينۋت” دەگەن تۇسىنىكتىڭ جوق ەكەنىن تۇسىندىرۋلەرىڭىز كەرەك ەدى. وسىلاي شۋلاتىپ جىبەرگەن وزدەرىڭىز, قازىر بۇكىل حالىق بەس مينۋت تۋرالى ايتىپ ءجۇر. مۇنى ىشكى ىستەر مينيسترلىگى مەن باسقا دا مەملەكەتتىك ورگاندار بىرىگىپ ءتۇسىندىرۋى ءتيىس ەدى. ال قازىر, ءتۇسىندىرۋ جۇمىستارىنىڭ جۇرگىزىلمەۋىنىڭ سالدارىن كورىپ وتىرمىز. كوپتەگەن ادام وسى ماسەلەنى حايپقا اينالدىرىپ جىبەردى, – دەدى دەپۋتات.
ءوز كەزەگىندە ىشكى ىستەر ءمينيسترىنىڭ ورىنباسارى يگور لەپەحا بەس مينۋت تۋرالى نورما جول قوزعالىسى تۋرالى زاڭدا «توقتاپ تۇرۋ» مەن «تۇراق» ۇعىمدارىن اجىراتۋ ءۇشىن قولدانىلعانىن ايتادى.
قوزعالتقىشتى قىزدىرۋ تۋرالى زاڭدا بەس مينۋت دەگەن تالاپ جوق. ەگەر تۇرعىندارعا قولايسىزدىق تۋدىرىپ, كەدەرگى جاسايتىن بولسا تەك مەحانيكالىق كولىكتەردىڭ قوزعالتقىشى قوسۋلى كۇيدە ەلدى مەكەندەردىڭ اراسىندا توقتاپ تۇرۋىنا تىيىم سالىنادى. بۇل نورما بويىنشا تەك شاعىم تۇسكەن جاعدايدا عانا جاۋاپكەرشىلىككە تارتىلادى. وتكەن جىلى وسىنداي ءۇش جاعداي بولدى, ونىڭ بىرەۋىن پروكۋراتۋرا توقتاتتى. ياعني, قوزعالتقىشتى قىزدىرعانى ءۇشىن ەشكىمگە ايىپپۇل سالىنعان جوق. بۇل – قولدان جاسالعان پروبلەما», – دەپ سەندىردى ۆيتسە-مينيستر.
بۇعان دەيىن ءماجىلىس دەپۋتاتى سەرىك ەرۋباەۆ وڭىرلەردىڭ تەمپەراتۋرالىق رەجيمى مەن كليماتىن ەسكەرە وتىرىپ, قوسۋلى كولىككە قاتىستى نورمانى قايتا قاراۋدى سۇراعان بولاتىن.
ال قر ءىىم بۇل جاڭاشىلدىق ەمەس ەكەنىن, اتالعان نورمانىڭ قولدانىسقا ەنگىزىلگەننەن بەرى 20 جىلدان استام ۋاقىت وتكەنىن اتاپ ءوتتى.
قر ءىىم اكىمشىلىك پوليتسيا كوميتەتى بۇل رەتتە قر اقبتك-ءنىڭ 597-بابىنان بۇزعانى ءۇشىن ازاماتتارعا 5 اەك (19 660 تەڭگە) مولشەرىندە, ال قايتالاپ بۇزعانى ءۇشىن – 10 اەك (39 320 تەڭگە) مولشەرىندە ايىپپۇل قاراستىرىلاتىنىن ەسكە سالدى.
