«قولىمدى قىسىپ, تابىس تىلەدى»: ديماش قۇدايبەرگەن سي تسزينپينمەن كەزدەسۋى جايلى

قازاقستاننىڭ حالىق ءارتىسى ديماش قۇدايبەرگەن “ورتالىق ازيا – قىتاي” ءسامميتىنىڭ ءىس-شارالارىنا قاتىستى. سالتاناتتى كەشتە ءانشى قابىلداۋشى ەلدىڭ مادەني وكىلى رەتىندە جيىندا ءوزىنىڭ رەپەرتۋارىنداعى قىتاي تىلىندەگى ەڭ ادەمى ليريكالىق اندەردىڭ ءبىرى – «荆棘王冠» / «The Crown» ءانىن ورىندادى, دەپ حابارلايدى Qandastar.kz اقپارات پورتالى BAQ.KZ-كە سىلتەمە جاساپ.

بۇل ءان قازاقستاندىق كومپوزيتور ۇلىقپان جولداسوۆتىڭ 2017 جىلى استانادا وتكەن جەكە كونتسەرتىندە العاش رەت ورىنداعان «كىم ەكەن» شىعارماسىنىڭ قىتايلىق نۇسقاسى.

قىتايعا ساپار جاساماستان بۇرىن, جاس كەزىمدە مەن قىتاي مادەنيەتىن دجەكي چانمەن, بريۋس ليمەن, كۋنگ-فۋمەن بايلانىستىرعان بولاتىنمىن. بىراق مەن جۇمىس ساپارىممەن بارىپ, قىتايدا ءومىر سۇرگەن كەزىمدە مەنىڭ بۇل ەلگە دەگەن قابىلداۋىم وزگەردى. مەن قىتاي حالقىنىڭ قوناقجايلىلىعى مەن ەڭبەكقورلىعىنا ەرەكشە تاڭ قالدىم. ازيا ەلدەرىنىڭ وكىلدەرى بولعاندىقتان ءبىزدىڭ ءداستۇرىمىز بەن تاربيەمىزدە ۇقساسىتىقتار بار. مىسالى ۇلكەنگە قۇرمەت, كىشىگە ىزەت سياقتى تۇسىنىكتەر – ءبىزدى جاقىنداستىرادى. سونداي-اق ءبىزدى بىلىمگە, مادەنيەت پەن عىلىمعا دەگەن ۇمتىلىس بىرىكتىرەدى, — دەيدى ديماش قىتايلىق CGTN ارناسىنا بەرگەن سۇقباتىندا.

ديماش قۇدايبەرگەن ەلىمىزدىڭ مادەنيەتىن تانىتۋشى وكىل رەتىندە شىعارماشىلىق سىيىن بىرنەشە رەت ۇسىنعانىن ەسكە الدى.

ونىڭ سوزىنشە, 2017 جىلى بەيجىڭدە تۇسىرىلىمدەرگە ءتۇسىپ, ءىس-شارالارعا قاتىسىپ جۇرگەنىندە شاقىرتۋ العان. ۇيىمداستىرۋشىلار سي ءتسزينپيننىڭ استاناعا كەلەتىنى جانە ەلىمىزدىڭ قۇرمەتتى قوناعى بولاتىنى تۋرالى ايتقان. ءسويتىپ ديماشتان قازاقشا, قىتايشا 1-2 ءان ورىنداپ بەرۋدى وتىنگەن.

ارينە ءبىز ءوز ەلىمىزدىڭ مادەنيەتىن تانىتۋشى وكىل رەتىندە قىتاي حالقىنىڭ قولداۋىن ەسكەرە وتىرىپ, شىعارماشىلىق سىيىمىزدى ءبىر ەمەس, بىرنەشە رەت ۇسىندىق. «جاسمين» ءانى قىتاي مادەنيەتىندە ەرەكشە ورىن الاتىندىقتان, ونى كەز-كەلگەن ادام ورىنداي المايدى. بۇل ءاندى ورىنداۋدىڭ ءوزى ۇلكەن مارتەبە بولىپ سانالادى. سوندىقتان ۇيىمداستىرۋشىلار ءدال سول ءاندى ۇسىنعان بولاتىن. مەن ونى بارىنشا جوعارى دەڭگەيدە ورىنداۋعا تىرىستىم. قويىلىمنان كەيىن سي تسزينپين مىرزا قاسىما كەلىپ, قولىمدى قىسىپ, العىسىن ءبىلدىرىپ, قىتايداعى دا, شەتەلدەگى دە جەتىستىكتەرىممەن قۇتتىقتاپ, «ءاردايىم تابىس تىلەيمىن», – دەگەن جىلى لەبىزىن ءبىلدىردى. سودان بەرى ونەرىمدى جوعارى باعالايدى. ماعان جۇبايى ەكەۋى جانە بۇكىل وتباسىمەن مەنىڭ ونەرىمدى ەرەكشە قۇرمەتتەيتىنىن ايتىپ, شىنايى لەبىزىن ءبىلدىردى. ارينە, بۇل ۇلكەن جاۋاپكەرشىلىك, — دەيدى ءانشى.

ديماش حالىق يگىلىگى ءۇشىن, مەملەكەتارالىق مادەني بايلانىستاردى نىعايتۋ جولىندا ونەرىن كورسەتۋگە ارقاشان دايىن ەكەنىن جەتكىزدى.

سي تسزينپين مىرزاعا قازاق مادەنيەتىنە جانە قازاق تىلىندەگى اندەرگە دەگەن قۇرمەتى ءۇشىن العىسىمدى بىلدىرگىم كەلەدى. ەڭ ماڭىزدىسى, ارينە, ەكى ەلدىڭ دوستىعىنىڭ بەرىكتىگى. ەكى ەل اراسىنداعى ديپلوماتيالىق قارىم-قاتىناستاردىڭ دامىپ, ودان ءارى تەرەڭدەي بەرۋىن تىلەيمىن. ءاربىر قولايى كەلگەن ساتتە كوپشىلىكتىڭ الدىندا ايتىپ قالۋعا تىرىسامىن: الەمدە بىرلىك, كەلىسىم, تەڭدىك بولسىن. ەڭ باستىسى – بەيبىتشىلىك, — دەپ ايتتى ءانشى.