«Qolymdy qysyp, tabys tiledi»: Dımash Qudaıbergen Sı zınpınmen kezdesýi jaıly

Qazaqstannyń Halyq ártisi Dımash Qudaıbergen “Ortalyq Azııa – Qytaı” sammıtiniń is-sharalaryna qatysty. Saltanatty keshte ánshi qabyldaýshy eldiń mádenı ókili retinde jıynda óziniń repertýaryndaǵy qytaı tilindegi eń ádemi lırıkalyq ánderdiń biri – «荆棘王冠» / «The Crown» ánin oryndady, dep habarlaıdy Qandastar.kz aqparat portaly BAQ.KZ-ke silteme jasap.

Bul án qazaqstandyq kompozıtor Ulyqpan Joldasovtyń 2017 jyly Astanada ótken jeke konertinde alǵash ret oryndaǵan «Kim eken» shyǵarmasynyń qytaılyq nusqasy.

Qytaıǵa sapar jasamastan buryn, jas kezimde men Qytaı mádenıetin Djekı Chanmen, Brıýs Lımen, kýng-fýmen baılanystyrǵan bolatynmyn. Biraq men jumys saparymmen baryp, Qytaıda ómir súrgen kezimde meniń bul elge degen qabyldaýym ózgerdi. Men qytaı halqynyń qonaqjaılylyǵy men eńbekqorlyǵyna erekshe tań qaldym. Azııa elderiniń ókilderi bolǵandyqtan bizdiń dástúrimiz ben tárbıemizde uqsasytyqtar bar. Mysaly úlkenge qurmet, kishige izet sııaqty túsinikter – bizdi jaqyndastyrady. Sondaı-aq bizdi bilimge, mádenıet pen ǵylymǵa degen umtylys biriktiredi, — deıdi Dımash qytaılyq CGTN arnasyna bergen suqbatynda.

Dımash Qudaıbergen elimizdiń mádenıetin tanytýshy ókil retinde shyǵarmashylyq syıyn birneshe ret usynǵanyn eske aldy.

Onyń sózinshe, 2017 jyly Beıjińde túsirilimderge túsip, is-sharalarǵa qatysyp júrgeninde shaqyrtý alǵan. Uıymdastyrýshylar Sı zınpınniń Astanaǵa keletini jáne elimizdiń qurmetti qonaǵy bolatyny týraly aıtqan. Sóıtip Dımashtan qazaqsha, qytaısha 1-2 án oryndap berýdi ótingen.

Árıne biz óz elimizdiń mádenıetin tanytýshy ókil retinde Qytaı halqynyń qoldaýyn eskere otyryp, shyǵarmashylyq syıymyzdy bir emes, birneshe ret usyndyq. «Jasmın» áni Qytaı mádenıetinde erekshe oryn alatyndyqtan, ony kez-kelgen adam oryndaı almaıdy. Bul ándi oryndaýdyń ózi úlken mártebe bolyp sanalady. Sondyqtan uıymdastyrýshylar dál sol ándi usynǵan bolatyn. Men ony barynsha joǵary deńgeıde oryndaýǵa tyrystym. Qoıylymnan keıin Sı zınpın myrza qasyma kelip, qolymdy qysyp, alǵysyn bildirip, Qytaıdaǵy da, sheteldegi de jetistikterimmen quttyqtap, «Árdaıym tabys tileımin», – degen jyly lebizin bildirdi. Sodan beri ónerimdi joǵary baǵalaıdy. Maǵan jubaıy ekeýi jáne búkil otbasymen meniń ónerimdi erekshe qurmetteıtinin aıtyp, shynaıy lebizin bildirdi. Árıne, bul úlken jaýapkershilik, — deıdi ánshi.

Dımash halyq ıgiligi úshin, memleketaralyq mádenı baılanystardy nyǵaıtý jolynda ónerin kórsetýge árqashan daıyn ekenin jetkizdi.

Sı zınpın myrzaǵa qazaq mádenıetine jáne qazaq tilindegi ánderge degen qurmeti úshin alǵysymdy bildirgim keledi. Eń mańyzdysy, árıne, eki eldiń dostyǵynyń beriktigi. Eki el arasyndaǵy dıplomatııalyq qarym-qatynastardyń damyp, odan ári tereńdeı berýin tileımin. Árbir qolaıy kelgen sátte kópshiliktiń aldynda aıtyp qalýǵa tyrysamyn: álemde birlik, kelisim, teńdik bolsyn. Eń bastysy – beıbitshilik, — dep aıtty ánshi.