«قولىن شاۋىپ تاستاعان»: قىزىلوردادا 20 جىل قۇلدىقتا بولدىق دەگەن وتباسى ادام سەنگىسىز دەرەكتەردى ايتتى

فوتو:24.Kz

قىزىلوردا وبلىسى قازالى اۋدانى اقسۋات اۋىلىندا تۇراتىن ءبۇتىن ءبىر وتباسى 20 جىل قۇلدىقتا بولعانىن ايتىپ, جانايقايىن ءبولىستى. ولار سول وڭىرگە بەلگىلى كاسىپكەردەن جىلدار بويى قورلىق كورىپ كەلگەنىن جەتكىزگەن, دەپ حابارلايدى  qandastar.kz 

قوجاگەلدى جالعاسباەۆ وسىدان 20 جىل بۇرىن قازاقستاندىق كاسىپكەر «جۇمىس تاۋىپ بەرەمىن» دەگەن ۋادەمەن وتباسىمەن بىرگە شەكارادان الىپ وتكەنىن مالىمدەگەن. ونىڭ ايتۋىنشا, سودان بەرى كورگەن كۇنى ادام ايتسا سەنگىسىز. 20 جىلدان بەرى ايدالادا مالىن باققىزىپ, قولىما كوك تيىن دا ۇستاتپادى, دەيدى ول. جالعىز ءوزىن عانا ەمەس, جولداسى مەن بالا-شاعاسىن دا قارا جۇمىسقا جەككەنىن ايتادى.

«شەكارادان وزدەرى الىپ ءوتتى مەنى. وسى جاققا اكەپ, مال باقتىرىپ قويدى. سول 20 جىل بولدى عوي. مال باققانىما بۇل جەرگە. انا ادامعا دا, مىنا ادامعا دا ايتام. قۇداي ايداپ, مىنا ىنىمە ايتتىم. وسى كىسىلەرمەن كەتىپ قالدىم, قاشىپ كەتتىم مەن. بالا-شاعام قالدى انا جاقتا», — دەيدى قوجاگەلدى جالعاسباەۆ.

ايدالادا مال باعىپ جۇرگەن جەرىنەن قازالى قالاسىنىڭ تۇرعىنى ۇيىنە اكەلىپ, اس اۋقاتىن بەرىپ, كيىم-كەشەكپەن قامتاماسىز ەتكەن.

«قانشا ازاپ كورىپ كەلە جاتىرمىن عوي مەن. ۇرىپ-سوعادى. ايدالادا جاتام جازداي. بالا-شاعا ءار جەردە ءجۇر. ايەلىم ءبىر جاقتا ءجۇر. بالالار سونىڭ جۇمىسىندا ءجۇر. بالامنىڭ قولىن مىنا جەردەن شاۋىپ تاستاعان. بالالاردى دا ۇرىپ-سوعادى. ءۇش بالام دا وقىمايدى. مەكتەپكە بارماعان. وتىرىك انىقتاما الادى ەكەن بۇلار, وقىپ جاتىر دەگەن. ساۋاتسىز ۇشەۋى دە», — دەيدى قوجاگەلدى جالعاسباەۆ.

24kz جازعانداي,  ءۇش بالاسى دا قۇلدىقتا جۇرگەن جىلدارى ومىرگە كەلگەن.

«ەكى بالامدى مىنا لاشىقتا ومىرگە اكەلدىم», — دەيدى قوجاگەلدىنىڭ كەلىنشەگى شولپان.

«بۇل بالالارىمدى كورگەن دە جوقپىن. سول جاققا الىپ كەتەدى, ءبىر ءوزىم ءجۇردىم مالدىڭ باسىندا. «انانى, مىنانى ىستەمەدىڭ», — دەيدى. قوراسى تازالانباي قالادى, ماعان ايتادى: «قورا تازالانبادى, نەعىپ وتىرسىڭ. ۇلكەن ۇلدى تىر جالاڭاش قويدى دالاعا, كۇن سۋىقتا. ۇستىنە سۋدى قۇيىپ-قۇيىپ», — دەيدى», — دەپ ءبولىستى شولپان جالعاسباەۆا.

ەستىگەن ادامنىڭ توبە قۇيقاسىن شىمىرلاتاتىن وقيعا تۋرالى ەكى اپتا بۇرىن بەلگىلى بولعان.

اتالعان جايتقا اۋداندىق پوليتسيا ءبولىمىنىڭ وكىلى پىكىر ءبىلدىردى.

«باس بوستاندىعىنان زاڭسىز ايىرۋ فاكتىسى بويىنشا پوليتسيا تەرگەپ-تەكسەرۋ باستادى. قازىرگى ۋاقىتتا بولعان وقيعانىڭ بارلىق ءمان-جايىن انىقتاۋ ءۇشىن تەرگەۋ ءىس-شارالارىنىڭ كەشەنى جۇرگىزىلىپ جاتىر», — دەدى قازالى اپب باستىعىنىڭ تەرگەۋ جونىندەگى ورىنباسارى قۋاندىق ورازوۆ.