جاڭالىقتار
«كومەك كورسەتىلەدى». ءىىم جول اپاتىنان قازا تاپقان پوليتسەيلەرگە قاتىستى پىكىر ءبىلدىردى
فوتو: facebook.com/erzhansadenov
ىشكى ىستەر ءمينيسترى ەرجان سادەنوۆ Facebook جەلىسىندەگى پاراقشاسىندا جامبىل وبلىسىنداعى تاس جولدا بولعان جول اپاتىنان قازا تاپقانداردىڭ وتباسىنا كوڭىل ايتتى دەپ حابارلايدى Ozgeris.Info.
«جامبىل وبلىسىندا جول قاۋىپسىزدىگىن قامتاماسىز ەتىپ ءجۇرىپ, قىزمەتتىك بورىشىن ورىنداۋ بارىسىندا قازا تاپقان پوليتسيا قىزمەتكەرلەرىنىڭ وتباسىنا جانە جاقىندارىنا قايعىرا كوڭىل ايتامىن. ولاردىڭ ەلگە سىڭىرگەن ەڭبەگى ەشقاشان ۇمىتىلمايدى. قازا تاپقانداردىڭ وتباسىلارىنا بارلىق قاجەتتى كومەك كورسەتىلەدى. قايعىلى وقيعانىڭ ءمان-جايىن تەرگەۋ بارىسى مەنىڭ جەكە باقىلاۋىمدا», — دەپ جازدى ءىىم باسشىسى.
كەشە تۇندە مەركى-شۋ-بۋرىلبايتال تاسجولىندا Toyota Alphard مينيۆەنى مەن Skoda Octavia پوليتسەي كولىگى بەتپە-بەت سوقتىعىسىپ, مينيۆەن ورتەنىپ كەتكەنىن بۇعان دەيىن حابارلاعان بولاتىنبىز. وقيعا سالدارىنان ەكى پوليتسيا قىزمەتكەرى مەن مينيۆەننىڭ ءتورت جولاۋشىسى وقيعا ورنىندا كوز جۇمدى. كەيىنىرەك ءىىم بولعان وقيعانىڭ ەگجەي-تەگجەيىن حابارلادى.
بەلگىلى بولعانداي, قازا تاپقان پوليتسيا قىزمەتكەرلەرىنىڭ ءبىرى 11 بالانى تاربيەلەپ وتىرعان كوپ بالالى اكە ەكەن.
