كومپانيانىڭ بۇرىنعى قىزمەتكەرى باستىعىنان ءوش الۋ ءۇشىن سۋ ساتاتىن ماشينالاردى بۇلدىرگەن

سۋ ساتاتىن اۆتوماتتاردى قاساقانا بۇلدىرگەن ايەلگە ايىپپۇل سالىندى. ول تيىن سالۋعا ارنالعان ۇياشىقتاردى بىتەپ, QR كودتارى بار قاعازداردى زاقىمداعان, دەپ حابارلايدى Qandastar.kz.

قوستاناي سوتى سۋ ساتۋ اۆتوماتتارىن ورناتاتىن كومپانيانىڭ بۇرىنعى قىزمەتكەرى جاۋاپقا تارتتى. بۇرىنعى جۇمىس بەرۋشىگە دەگەن رەنىشىنىڭ سالدارىنان ول كومپانيانىڭ مۇلكىنە زيان كەلتىرگەن.

ايەلدىڭ سوزىنشە, بۇرىنعى جۇمىس ورنىندا ەڭبەك كىتاپشاسىن جانە جالاقىسىنىڭ ءبىر بولىگىن بەرمەگەن.

«سوتقا ايەلدىڭ QR كودتارىن ءبۇلدىرىپ, ماشينالاردى بىتەپ تاستاعانىن راستايتىن ۆيدەو-ايعاقتار, فوتوسۋرەتتەر جانە كۋالاردىڭ ايعاقتارى ۇسىنىلدى. سوتتىڭ قاۋلىسىمەن  اكىمشىلىك قۇقىقبۇزۋشىلىق تۋرالى كودەكستىڭ 147-1-بابىنىڭ 1-بولىگى “بوتەننىڭ مۇلكىنە قاساقانا زيان كەلتىرۋ” بويىنشا اكىمشىلىك جاۋاپكەرشىلىككە تارتىلىپ, وعان 17 360 تەڭگە اكىمشىلىك ايىپپۇل سالىندى», – دەلىنگەن حابارلامادا.

ايەل قاڭتاردا جۇمىستان شىعىپ كەتكەن, ال ناۋرىز ايىندا ماشينالاردا اقاۋلار باستالعان. قالا تۇرعىندارى جۇمىس ىستەمەيتىن سۋ ماشينالارىنا بىرنەشە رەت شاعىمدانعان. QR كودتارىمەن تولەم جاساۋدى مۇمكىن بولمادى, ال مونەتا قابىلداعىشتار بىتەلىپ قالدى. كومپانيا قىزمەتكەرلەرىنىڭ ءبىرى بۇرىنعى قىزمەتكەردىڭ ارەكەتىن ۆيدەوعا ءتۇسىرىپ الىپ, دەرەۋ پوليتسياعا حابارلاسقان.