جاڭالىقتار
«كونتسەرتكە ادام تولماي جاتسا, مۇعالىمدەردىڭ نە جازىعى بار?!» مۇقاەۆ زاڭسىزدىقتى اشكەرەلەدى
فوتو: پارلامەنت
ءماجىلىس دەپۋتاتى داۋلەت مۇقاەۆقا كوللەدج وقىتۋشىلارى جۇگىنگەن. ولاردىڭ سوزىنشە, بەلگىلى توپتىڭ كونتسەرتىنە ءماجبۇرلى تۇردە بيلەت ساتىپ الىپ جاتىر, دەپ حابارلايدى qandastar.kz
«وسىنداي مازمۇنداعى حاتتار ءجيى كەلىپ جاتادى. مۇعالىمدەردى كونتسەرتكە بيلەت الۋعا ماجبۇرلەۋ – زاڭسىز! بىلىم سالاسىنىڭ قىزمەتكەرلەرىنەن, اتاپ ايتقاندا كوللەدج, مەكتەپ مۇعالىمدەرىنەن “الاتاۋ سەرىلەرىنىڭ” كونتسەرتىنە 5000 تەڭگەدەن بيلەت الۋدى تالاپ ەتىپ جاتىر دەگەن بىرنەشە حات كەلۋدە.
بۇل – ورەسكەل زاڭبۇزۋشىلىق! ەشكىمدى ەركىنە قارسى قانداي دا ءبىر شاراعا قاتىسۋعا نەمەسە بيلەت ساتىپ الۋعا ماجبۇرلەۋگە بولمايدى. قر ەڭبەك كودەكسىنە جانە «سىبايلاس جەمقورلىققا قارسى ءىس-قيمىل تۋرالى» زاڭعا سايكەس, مۇنداي ماجبۇرلەۋ – قىزمەتتىك وكىلەتتىلىكتى اسىرا پايدالانۋ», — دەدى دەپۋتات.
Dalanews.kz جازعانداي, دەپۋتاتتىڭ سوزىنشە, مۇعالىم – ءبىلىم بەرۋشى, ساتىلاتىن كورەرمەن ەمەس.
«ەگەر ءسىز وسىنداي قىسىمعا تاپ بولساڭىز ءتيىستى ورگانعا شاعىم ءتۇسىرىڭىز. وز قۇقىعىڭىزدى ءبىلىڭىز جانە قورعاڭىز. ۇجىمدا مۇنداي ارەكەتكە قارسى پىكىر بىلدىرۋدەن قورىقپاڭىزدار!!! مۇعالىمدەردىڭ بەدەلى كونتسەرتتىڭ كورەرمەن سانىمەن ولشەنبەيدى!
رەسپۋبليكا سارايىنا ادام تولماي جاتسا, مۇعالىمدەردىڭ نە جازىعى بار?! شاعىن ساحنالاردا دا كونتسەرت بەرۋگە بولادى-مىس. كورەسىزدەر, مىنا پوستتان كەيىن ءماجبۇرلى بيلەت الدىرۋعا قاتىستى ءبىلىم ءبولىمى دە,انشىلەر دە ەشتەڭە بىلمەي شىعادى», — دەدى مۇقاەۆ.
