قورعانىس مينيسترلىگى اسكەردەگى ءولىمنىڭ 90%-ى الىمجەتتىكتەن ەمەس, وتباسىلىق كيكىلجىڭدەر ءۇشىن بولاتىنىن مالىمدەدى

فوتو: اشىق دەرەككوز

قورعانىس ءمينيسترىنىڭ ورىنباسارى شايح-حاسان جازىقباەۆ ساربازداردىڭ «وتباسىلىق جاعدايعا بايلانىستى» ءوز-وزىنە قول جۇمسايتىنىن ايتتى. ۆەدومستۆو اسكەريلەر ءولىمىنىڭ 90 پايىزى اسكەري قىزمەتكە مۇلدەم قاتىسى جوق دەگەن مالىمدەمە جاسادى. بۇل تۋرالى qandastar.kz Stan.kz اقپارات اگەنتتىگىنە سىلتەپ حابارلايدى.

“قازىر ازاماتتىق قوعامدا ەكى دۇرىس ەمەس تۇجىرىم قالىپتاسقانىن كورىپ وتىرمىز. ءبىرىنشىسى, بەيبىت ۋاقىتتا ساربازدار اسكەردە كوز جۇمادى. ەكىنشىسى, اسكەري قىزمەتكەرلەر اراسىنداعى الىمجەتتىككە قاتىستى. ءولىم-ءجىتىم مەن جاراقات تۋرالى ايتار بولساق, ارميادا اسكەري بورىشتى وتەۋ وڭاي ەمەس ءارى قاۋىپتى. قازاقستان ارمياسىندا سارباز اسكەري تەحنيكانى پايدالانادى, جاتتىعۋ جاسايدى, وق اتىپ, اتىس دايىندىعىنان وتەدى جانە كولىك جۇرگىزەدى”, – دەيدى شايح-حاسان جازىقباەۆ.

گەنەرال-مايوردىڭ ايتۋىنشا, اسكەري قىزمەتكەرلەر ناعىز جاۋىنگەرلىك قارۋ قولدانادى. سول سەبەپتى جاراقات الاتىندار كوپ جانە جاراقات الۋ قاۋپى جوعارى. سوزىنشە, قابىلدانعان ءىس-شارالارعا قاراماستان اسكەريلەر اراسىندا ءولىم جاعدايلارى تىركەلەدى.

“جاۋىنگەرلەردىڭ جاراقات الۋى مەن ءولىمىنىڭ نەگىزگى سەبەپتەرى – قارۋ مەن وق-دارىمەن دۇرىس پايدالانباۋ, تەحنيكانى پايدالانۋ كەزىندەگى قاۋىپسىزدىك شارالارىن بۇزۋ, جول-كولىك وقيعالارى, اۋرۋعا شالدىعۋ. ال وز-وزىنە قول جۇمساۋ جانە سۋيتسيدكە يتەرمەلەۋ وتباسىلىق كيكىلجىڭدەرگە بايلانىستى بولادى. مۇنداي جاعدايلاردىڭ 90%-عا جۋىعى اسكەري قىزمەتكە قاتىستى ەمەس”, – دەپ شورت كەستى قورعانىس ءمينيسترىنىڭ ورىنباسارى شايح-حاسان جازىقباەۆ.

ەسكە سالايىق, سوڭعى ۋاقىتتا اسكەردەن دەنساۋلىعىنان ايىرىلىپ نەمەسە تابىتپەن ورالعان ساربازدار كوبەيدى. ولاردىڭ ءبىرى – ەربايان مۇحتار. ەربايان ۇلتتىق ۇلاننىڭ الماتى قالاسىنداعى 5571 اسكەري بولىمىندە اسكەري بورىشىن وتەپ جۇرگەن. 2023 جىلدىڭ جەلتوقسانىندا سارباز مي جاراقاتىن الىپ, سودان كەيىن كوماعا تۇسكەن. اسكەريلەر تۋىستارىنا ەرباياننىڭ دارەتحانادا قۇلاپ, باسىن ەدەنگە سوعىپ العانىن ايتقان. الايدا ساربازدىڭ جاقىندارى ۇلدارىنىڭ ابايسىزدا قۇلاپ قالعانىنا سەنبەيدى. ىشكى ىستەر مينيسترلىگى تەرگەۋ بارىسىن ءوز باقىلاۋىنا الدى. 

بۇعان دەيىن قازاقستاندىقتار 6 ايدان استام كومادا جاتقان سارباز ەربايان مۇحتارعا 140 ميلليون تەڭگە جيناپ بەرگەن ەدى. 17 قىركۇيەكتە ەرباياننىڭ اكەسى ۇلىنىڭ الداعى ۋاقىتتا ەۋروپاعا ەمدەلۋگە اتتاناتىنى تۋرالى ايتقان. ەمدەۋگە شامامەن 230 ميلليون تەڭگە جينالدى, بۇل اقشا وڭالتۋدىڭ العاشقى ءۇش ايىنا جەتەدى دەيدى.