Qorǵanys mınıstrligi áskerdegi ólimniń 90%-y álimjettikten emes, otbasylyq kıkiljińder úshin bolatynyn málimdedi

Foto: ashyq derekkóz

Qorǵanys mınıstriniń orynbasary Shaıh-Hasan Jazyqbaev sarbazdardyń «otbasylyq jaǵdaıǵa baılanysty» óz-ózine qol jumsaıtynyn aıtty. Vedomstvo áskerıler óliminiń 90 paıyzy áskerı qyzmetke múldem qatysy joq degen málimdeme jasady. Bul týraly qandastar.kz Stan.kz aqparat agenttigine siltep habarlaıdy.

“Qazir azamattyq qoǵamda eki durys emes tujyrym qalyptasqanyn kórip otyrmyz. Birinshisi, beıbit ýaqytta sarbazdar áskerde kóz jumady. Ekinshisi, áskerı qyzmetkerler arasyndaǵy álimjettikke qatysty. О́lim-jitim men jaraqat týraly aıtar bolsaq, armııada áskerı boryshty óteý ońaı emes ári qaýipti. Qazaqstan armııasynda sarbaz áskerı tehnıkany paıdalanady, jattyǵý jasaıdy, oq atyp, atys daıyndyǵynan ótedi jáne kólik júrgizedi”, – deıdi Shaıh-Hasan Jazyqbaev.

General-maıordyń aıtýynsha, áskerı qyzmetkerler naǵyz jaýyngerlik qarý qoldanady. Sol sebepti jaraqat alatyndar kóp jáne jaraqat alý qaýpi joǵary. Sózinshe, qabyldanǵan is-sharalarǵa qaramastan áskerıler arasynda ólim jaǵdaılary tirkeledi.

“Jaýyngerlerdiń jaraqat alýy men óliminiń negizgi sebepteri – qarý men oq-dárimen durys paıdalanbaý, tehnıkany paıdalaný kezindegi qaýipsizdik sharalaryn buzý, jol-kólik oqıǵalary, aýrýǵa shaldyǵý. Al óz-ózine qol jumsaý jáne sýııdke ıtermeleý otbasylyq kıkiljińderge baılanysty bolady. Mundaı jaǵdaılardyń 90%-ǵa jýyǵy áskerı qyzmetke qatysty emes”, – dep short kesti Qorǵanys mınıstriniń orynbasary Shaıh-Hasan Jazyqbaev.

Eske salaıyq, sońǵy ýaqytta áskerden densaýlyǵynan aıyrylyp nemese tabytpen oralǵan sarbazdar kóbeıdi. Olardyń biri – Erbaıan Muhtar. Erbaıan Ulttyq ulannyń Almaty qalasyndaǵy 5571 áskerı bóliminde áskerı boryshyn ótep júrgen. 2023 jyldyń jeltoqsanynda sarbaz mı jaraqatyn alyp, sodan keıin komaǵa túsken. Áskerıler týystaryna Erbaıannyń dárethanada qulap, basyn edenge soǵyp alǵanyn aıtqan. Alaıda sarbazdyń jaqyndary uldarynyń abaısyzda qulap qalǵanyna senbeıdi. Ishki ister mınıstrligi tergeý barysyn óz baqylaýyna aldy. 

Buǵan deıin qazaqstandyqtar 6 aıdan astam komada jatqan sarbaz Erbaıan Muhtarǵa 140 mıllıon teńge jınap bergen edi. 17 qyrkúıekte Erbaıannyń ákesi ulynyń aldaǵy ýaqytta Eýropaǵa emdelýge attanatyny týraly aıtqan. Emdeýge shamamen 230 mıllıon teńge jınaldy, bul aqsha ońaltýdyń alǵashqy úsh aıyna jetedi deıdi.