قورعانىس مينيسترلىگى اسكەرگە شاقىرۋ جاسىنداعى ازاماتتارعا قاتىستى مالىمدەمە جاسادى

فوتو: Zakon.kz,

قورعانىس مينيسترلىگىنىڭ ءباسپاسوز قىزمەتى 2025 جىلى 7 ماۋسىمدا اسكەرگە شاقىرۋ جاسىنداعى ازاماتتارعا قاتىستى رەيدتەر بويىنشا مالىمدەمە جاسادى, دەپ حابارلايدى  qandastar.kz  Zakon.kz-كە سىلتەمە جاساپ.

باق پەن الەۋمەتتىك جەلىلەردە اسكەرگە شاقىرۋ جاسىنداعى ازاماتتاردى ءماجبۇرلى تۇردە ۇستاپ, جەرگىلىكتى اسكەري باسقارۋ ورگاندارىنا جەتكىزۋ تۋرالى بەينەماتەريالداردىڭ تارالۋىنا بايلانىستى قورعانىس مينيسترلىگى كەلەسىنى حابارلايدى:

«قازاقستاندا ازاماتتاردى مەرزىمدى اسكەري قىزمەتكە شاقىرۋ جىل سايىن زاڭناماعا سايكەس جۇرگىزىلەدى. الايدا شاقىرۋ ناۋقانى بارىسىندا كەيبىر ازاماتتاردىڭ اسكەري قىزمەتتەن جالتارۋى نەمەسە زاڭ بويىنشا كەلۋ تالابىن ۋاقىتىلى ورىنداماۋى سياقتى قيىندىقتار تۋىندايدى. بۇل كوبىنە ازاماتتاردىڭ تىركەۋدە تۇرعان مەكەنجايدا تۇرماۋى نەمەسە جاڭا مەكەنجايعا تىركەلمەۋىمەن بايلانىستى».

ۆەدومستۆو ەگەر شاقىرۋ قاعازىن ازاماتقا جەكە تابىستاۋ مۇمكىن بولماسا, ونى جەتكىزۋدى ىشكى ىستەر ورگاندارى جۇزەگە اسىراتىنىن ناقتىلايدى. رەيدتەر كەزىندە كەيبىر ازاماتتار پوليتسيا قىزمەتكەرلەرىنىڭ زاڭدى تالاپتارىنا باعىنباي, قارسىلىق كورسەتەدى, بۇل ولاردىڭ ءماجبۇرلى تۇردە جەتكىزىلۋىنە سەبەپ بولادى.

«شاقىرۋ پۋنكتتەرىندە ازاماتتاردىڭ مەرزىمدى اسكەري قىزمەتكە شاقىرىلۋ نەگىزدەرى بار-جوعى انىقتالادى. ەگەر نەگىزدەر بولماسا – ازامات ۇيىنە قايتارىلادى. ال نەگىز بولعان جاعدايدا – مەديتسينالىق تەكسەرۋدەن ءوتىپ, ءارى قارايعى شاقىرۋ شارالارىنان وتەدى». قر قورعانىس مينيسترلىگىنىڭ ءباسپاسوز قىزمەتى

مەرزىمدى اسكەري قىزمەتتەن جالتارعانى ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعانى ەسكەرتىلەدى.

«وسىعان بايلانىستى, ازاماتتاردى قولدانىستاعى زاڭ تالاپتارىن ساقتاۋعا جانە جالعان اقپارات تاراتۋدان باس تارتۋعا شاقىرامىز», دەلىنگەن رەسمي حابارلامادا.

2025 جىلدىڭ 5 ماۋسىمىندا سەناتتا وتكەن بريفينگتە قر قارۋلى كۇشتەرى باس شتابىنىڭ باستىعى – قورعانىس ءمينيسترىنىڭ ءبىرىنشى ورىنباسارى سۇلتان قامالەتدينوۆ جاستاردىڭ نەلىكتەن اسكەرگە بارۋدان قورقاتىنىنا قاتىستى ءوز ويىمەن بولىسكەن بولاتىن.