Qorǵanys mınıstrligi qazaqstandyqtarǵa úndeý jasady

Qorǵanys mınıstrliginiń resmı ókili Rýslan Jangýlınniń aıtýynsha, Uly Otan soǵysyndaǵy Jeńistiń 80 jyldyǵyna arnalǵan Astana qalasynda ótetin áskerı paradqa daıyndyq sharalaryna baılanysty 13 naýryzdan bastap jeke quramdy tasymaldaý jáne áskerı tehnıkanyń temirjol kóligimen de, óz júrisimen qozǵalysy bastalady dep josparlanyp otyr.

Sondaı-aq 2025 jylǵy 22 sáýir men 7 mamyr aralyǵynda áskerı avıaııanyń jattyǵý ushýlaryn júrgizý úshin Astanada áýe keńistigin paıdalanýǵa qysqa merzimdi shekteýler qoıylady.

«Osyǵan baılanysty áýe reısteriniń kestesine de ózgerister engizilýi múmkin. Biz azamattarǵa reıster týraly aqparatty aldyn ala naqtylaýdy usynamyz. Engizilgen shekteýlerge túsinistikpen qaraýdy, jalǵan aqparat taratpaı, tek resmı derekkózderge júginýdi suraımyz», — dedi vedomstvonyń resmı ókili.