قورعانىس مينيسترلىگى مەدكوميسسيانىڭ نەلىكتەن اۋرۋى بار ساربازداردى اسكەرگە جارامدى دەپ تانيتىنىن ءتۇسىندىردى

فوتو: اشىق دەرەككوز

قورعانىس مينيسترلىگى قازاقستاندا دەنساۋلىعىندا كىناراتى بار جىگىتتەردىڭ نەلىكتەن اسكەردە جۇرگەنىنە جاۋاپ بەردى. ايتۋىنشا, شاقىرتۋ العان ازاماتتار ءوز اۋرۋلارى تۋرالى بىلمەيدى نەمەسە مەديتسينالىق كوميسسيادان ءوتۋ كەزىندە ادەيى جاسىرادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

جاقىندا سەناتور امانگەلدى نۇعمانوۆ اسكەرگە شاقىرىلۋشىلاردىڭ مەديتسينالىق تەكسەرۋ جۇيەسىن سىنعا الدى. ايتۋىنشا, دارىگەرلەرگە ساپالى دياگنوز قويۋعا ۋاقىت جەتىسپەيدى. سوندىقتان «دەنساۋلىعى جارامسىز» ساربازدار اسكەرگە كەتىپ جاتىر.

«مەرزىمدى قىزمەتتەگى ساربازداردا اۋرۋدىڭ بولۋ فاكتىلەرى بار. كەيدە اسكەرگە شاقىرىلۋشىلار مەديتسينالىق كوميسسيادان وتكەن كەزدە وزدەرىنىڭ اۋرۋلارى تۋرالى بىلمەيدى نەمەسە جاسىرادى. مۇنداي اۋرۋلار ولاردىڭ اسكەري قىزمەتكە بەيىمدەلۋ كەزەڭىندە, فيزيكالىق جانە پسيحولوگيالىق جۇكتەمەلەر كۇشەيگەن جاعدايدا كورىنەدى», – دەپ ءتۇسىندىردى قورعانىس مينيسترلىگى دەپۋتاتقا.

ۆەدومستۆو قازاقستانداعى اسكەرگە شاقىرىلۋشىلار زاڭ بويىنشا ەكى كەزەڭدىك مەديتسينالىق تەكسەرۋدەن وتەتىنىن ەسكە سالدى.

ء«بىرىنشى كەزەڭ – شاقىرۋ كوميسسياسىنىڭ قورىتىندىسىن شىعارا وتىرىپ, قورعانىس ىستەرى جونىندەگى باسقارمالار جانىنداعى اۋداندىق دەڭگەيدە مەديتسينالىق كۋالاندىرۋ. وسى كەزەڭدە امبۋلاتوريالىق جانە ستاتسيونارلىق تەكسەرۋلەردى جۇرگىزۋ ءۇشىن ۋاقىت شەكتەۋلەرى بەلگىلەنبەگەن. ەكىنشى كەزەڭ – قورعانىس ىستەرى جونىندەگى دەپارتامەنتتەردىڭ قۇراما پۋنكتتەرىندەگى مەديتسينالىق تەكسەرۋ. بۇل اۋدان دەڭگەيىندە مۇمكىن بولاتىن كەمشىلىكتەردى انىقتاۋ ءۇشىن قاجەت», – دەپ حابارلادى قورعانىس مينيسترلىگى.

مينيسترلىك سونىمەن قاتار, اسكەرگە كەلەردە ادەتتە ساربازداردان تەكسەرىس كەزىندە اراۋ انىقتالمايتىنىن ايتتى. ال اۋرۋ انىقتالسا سارباز قوسىمشا تەكسەرۋ ءۇشىن اۋدانعا قايتارىلادى ەكەن.

سەنات سونىمەن قاتار اسكەري كوميسسارياتتارداعى مەديتسينالىق كوميسسيالارعا ەمەس, ەمحانالارداعى ۋچاسكەلىك دارىگەرلەرگە اسكەرگە «جارامدى» نەمەسە «جارامسىز» مارتەبەسىن بەرۋدى ۇسىندى. قورعانىس مينيسترلىگى بۇل يدەيانى قولداۋعا دايىن.

«دەنساۋلىق ساقتاۋ مينيسترلىگىنىڭ قۇزىرەتىنە ازاماتتاردى مەديتسينالىق كۋالاندىرۋ ماسەلەلەرىن, ونىڭ ىشىندە تىركەۋ بويىنشا ۋچاسكەلىك ەمحانالاردا مەديتسينالىق كوميسسيالاردى وتكىزۋ ماسەلەلەرىن زاڭنامالىق رەتتەۋ قۇقىعىن بەرۋگە قارسى ەمەسپىز», – دەپ اتاپ ءوتتى ۆەدومستۆودا.