جاڭالىقتار
«قورقىنىشتى فيلمدەگىدەي»: استانادا ابدەن توزىعى جەتكەن جاتاقحانا تابىلدى
فوتو: ۆيدەودان سكرين
بلوگەر استانادا ورنالاسقان, ابدەن توزىعى جەتكەن جاتاقحانانى كورسەتتى, دەپ جازدى qandastar.kz
نىساننىڭ قابىرعالارى ءتۇسىپ, اجەتحاناسى مەن جۋىناتىن بولمەسى قيراپ جاتىر. بۇل تۋرالى Stan.kz اقپارات اگەنتتىگى حابارلايدى.
بلوگەر توعجان كامزەباەۆا جاتاقحانادا تۇسىرىلگەن ۆيدەونى جەلىدە جۇكتەدى. ول بۇعان دەيىن دە قاراپايىم جاتاقحانالارداعى تۇرمىس جاعدايىن كورسەتىپ جۇرگەن ەدى. ول بۇل جولى لۋي پاستەر كوشەسى, 73-ۇيدەگى جاتاقحانانى شولىپ شىققان. كادرلاردا قابىرعاسى تۇسكەن, اجەتحاناسى مەن جۋىناتىن بولمەسى قيراعان جاتاقحانا كورسەتىلگەن.
«مەن تالاي جاتاقحانالاردى ارالادىم, بىراق مۇنداي جاعدايدى ءبىرىنشى رەت كورىپ تۇرمىن», – دەدى بلوگەر.
اتالعان جاعدايعا قاتىستى Stan.kz ءتىلشىسى استانا قالاسىنىڭ تۇرعىن ءۇي جانە تۇرعىن ءۇي ينسپەكتسياسى باسقارماسىنان ءمان-جايدى سۇراپ ءبىلدى.
ولاردىڭ مالىمەتىنشە, بۇل نىسان اپاتتى ۇيلەر تىزىمىنە ەنگەن. بۇل جەردىڭ تۇرعىندارى 2026 جىلى جاڭا پاتەرلەرگە قونىستانادى.
«2023-2029 جىلدارعا ارنالعان تۇرعىن ءۇي-كوممۋنالدىق ينفراقۇرىلىمدى دامىتۋ تۇجىرىمداماسىنا سايكەس قالادا اپاتتى ەسكى ۇيلەردى بۇزۋ جۇزەگە اسىرىلىپ جاتىر. استانا قالاسىنداعى اپاتتى ۇيلەر تىزىمىنە سايكەس لۋي پاستەر كوشەسىندەگى, №73 ءۇي 2025 جىلعا ارنالعان جوسپارعا ەنگىزىلگەن. قازىر تۇرعىنداردان قۇجات جيناۋ راسىمدەرى ءجۇرىپ جاتىر. اپاتتى جاعدايداعى №73 ءۇيدىڭ تۇرعىندارى 2026 جىلدىڭ I توقسانىندا جاڭا پاتەرلەرگە قونىستاندىرىلادى. وسىدان كەيىن اتالعان جاتاقحانانى بۇزۋ جوسپارلانعان. 2025 جىلعى 28 شىلدەدە استانا قالاسى تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ وكىلدەرى بايقوڭىر اۋدانى اكىمدىگىمەن بىرلەسىپ, لۋي پاستەر كوشەسىندەگى №73 اپاتتى ءۇيدىڭ تۇرعىندارىمەن كەزدەسۋ وتكىزدى. كەزدەسۋ بارىسىندا الداعى كوشىرۋ ماسەلەلەرىنە قاتىستى ءتۇسىندىرۋ جۇمىسى جۇرگىزىلدى», – دەلىنگەن حابارلامادا.
جاتاقحانانىڭ جاعدايىن كورگەن جەلى قولدانۋشىلارى بۇل عيماراتقا قورقىنىشتى فيلم تۇسىرۋگە بولاتىنىن ايتىپ, بيلىكتى سىنعا الدى.
«قورقىنىشتى فيلم تۇسىرۋگە سۇرانىپ تۇرعان ورىن ەكەن», «جاقسى ءومىر سۇرۋگە تىرىسۋ اركىمنىڭ ءوز ەركىندەگى نارسە. ماسەلەن, اك – 300 تەڭگە, بوياۋ – 1500 تەڭگە تۇرادى. بۇل ەكى قوراپ تەمەكىنىڭ باعاسى عانا», «پرەزيدەنت, مينيستر, دەپۋتاتتى وسى جەرگە ەرتىپ اكەلۋ كەرەك», «ۇكىمەت پەن مينيسترلەر قايدا قاراپ وتىر? بىزدە مۇنداي جاتاقحانالار وتە كوپ. ستۋدەنتتەرگە جانىڭ اشيدى. ارتتا قالعان ەل», «تۇرمەلەردىڭ وزىندە جاعداي بۇدان جاقسى شىعار. بۇل نىسان كەڭەس زامانىنان بەرى وسىلاي تۇر. ەشقاشان جوندەۋ جۇرگىزىلمەگەن. قورقىنىشتى جاعداي», – دەپ جازدى ولار.
