قوس ازاماتتىعى بار استانا تۇرعىنى قازاقستان مەن رەسەيدە 10 جىل بويى زەينەتاقى العان

ۆەدومستۆونىڭ حابارلاۋىنشا, قازاقستان مەن رەسەي فەدەراتسياسى مەملەكەتتەرىنىڭ قوس ازاماتتىعى بار قالا تۇرعىنى 10 جىل بويى ەكى مەملەكەتتىڭ اۋماعىندا ءبىر مەزگىلدە زەينەتاقى تولەمدەرىن الىپ وتىرعان.

«1992 جىلعى 13 ناۋرىزداعى تاۋەلسىز مەملەكەتتەر دوستاستىعىنا قاتىسۋشى مەملەكەتتەر ازاماتتارىنىڭ زەينەتاقىمەن قامسىزداندىرۋ سالاسىنداعى قۇقىقتارىنىڭ كەپىلدىكتەرى تۋرالى كەلىسىمگە سايكەس – قاتىسۋشى مەملەكەتتەر شەگىندە زەينەتكەر قونىس اۋدارعان كەزدە, ەگەر سول تۇردەگى زەينەتاقى زەينەتكەردىڭ جاڭا تۇرعىلىقتى جەرى بويىنشا مەملەكەتتىڭ زاڭناماسىندا كوزدەلسە, بۇرىنعى تۇرعىلىقتى جەرى بويىنشا زەينەتاقى تولەۋ توقتاتىلادى», – دەلىنگەن حابارلامادا.
ۆەدومستۆو زەينەتاقى تولەمدەرىن كەلىسىمگە قاتىسۋشى ەكى مەملەكەتتە ءبىر مەزگىلدە تاعايىنداۋ مۇمكىن ەمەس ەكەنىن حابارلادى.

قالا پروكۋراتۋراسىنىڭ دەن قويۋ اكتىسى بويىنشا سوتپەن زەينەتاقى تولەمدەرىن الۋشىدان 8,9 ملن تەڭگە مولشەرىندە زاڭسىز الىنعان زەينەتاقى تولەمدەرى ءوندىرىلدى.