كوشەدەن كۇشتەپ ۇستايدى: قورعانىس مينيسترلىگى اسكەرگە شاقىرىلعان ازاماتتاردى ماجبۇرلەپ اكەتۋگە قاتىستى پىكىر ءبىلدىردى

فوتو: ۆيدەودان سكرين

قورعانىس مينيسترلىگى الەۋمەتتىك جەلىلەردە تاراپ جاتقان اسكەرگە شاقىرىلعان ازاماتتاردى ماجبۇرلەپ ۇستاپ اكەتۋ ارەكەتىنە قاتىستى پىكىر ءبىلدىردى, دەپ جازدى qandastar.kz

بۇل تۋرالى  Stan.kzاقپارات اگەنتتىگى حابارلايدى.

مينيسترلىك قازاقستاندا اسكەري قىزمەتكە شاقىرۋ بەلگىلەنگەن تارتىپپەن جىل سايىن جۇرگىزىلەتىنىن ايتتى. دەگەنمەن ازاماتتار جالتارىپ, شاقىرۋ بويىنشا ۋاقىتىلى كەلمەۋىنە بايلانىستى قيىندىقتار تۋىندايدى دەيدى.

«كوبىنەسە بۇل كوپتەگەن ازاماتتاردىڭ تىركەلگەن جەرىندە تۇرماۋى نەمەسە ناقتى مەكەنجايى بويىنشا تىركەلمەۋى سالدارىنان بولادى.  شاقىرۋ قاعازىن ءوز بەتىنشە تاپسىرۋ مۇمكىن بولماعان جاعدايدا اسكەرگە شاقىرىلۋشىنىڭ كەلۋىن قامتاماسىز ەتۋ ىشكى ىستەر ورگاندارىنا جۇكتەلەدى. سونىمەن قاتار كەي ازاماتتار پوليتسيا قىزمەتكەرلەرىنىڭ زاڭدى تالاپتارىنا باعىنباي, قارسىلىق كورسەتىپ جاتىر. بۇل ولاردى اسكەرگە شاقىرۋ ۋچاسكەسىنە ماجبۇرلەپ جەتكىزۋگە اكەپ سوعادى», – دەلىنگەن حابارلامادا.

مينيسترلىكتەگىلەر شاقىرۋ كوميسسياسىنىڭ قىزمەتكەرلەرى ازاماتتىڭ اسكەرگە جارامدى نەمەسە جارامسىز ەكەنىن سول جەردە شەشەتىنىن ايتتى.

«ەگەر نەگىز بولماسا, ونى ۇيىنە جىبەرەدى. ولاي بولماعان جاعدايدا, ول مەديتسينالىق تەكسەرۋدەن وتۋگە جانە زاڭدا كوزدەلگەن قوسىمشا شارالارعا جىبەرىلەدى. اسكەرگە شاقىرۋدان جالتارۋ اكىمشىلىك جانە قىلمىستىق جاۋاپكەرشىلىككە تارتىلاتىنىن ەسكە سالامىز», – دەلىنگەن حابارلامادا.

ايتا كەتەيىك, بۇعان دەيىن قوستانايدا جىگىتتى اسكەري كوميسسارياتقا كۇشتەپ اكەتكەندەرگە قاتىستى پوليتسيا تەرگەۋ باستاعانىتۋرالى جازعان ەدىك.