جاڭالىقتار
«كوشەگە شىعا المادىم»: اقتوبەدە اتكەنشەكتەن قۇلاپ, كوز جۇمعان 9 جاسار بالانىڭ اناسى وقيعا تۋرالى ايتتى
اقتوبەدە ەسەت باتىر تۇرعىن ءۇي الابىندا 9 جاستاعى بالا اتكەنشەكتەن قۇلاپ كوز جۇمدى. ول باسىنان اۋىر جاراقات العان كورىنەدى. جەدەل جاردەم كەلگەنشە جان تاپسىرعان, دەپ حابارلايدى ozgeris.info استانا ارناسىنا سىلتەمە جاساپ.
تەلەارنانىڭ حابارلاۋىنشا, 9 جاستاعى ابات كورشى ءۇيدىڭ اۋلاسىندا ويناپ ءجۇرىپ, قۇلاعان.ءۇيدىڭ بەينەباقىلاۋ كامەراسىنا ونىڭ قۇلاعان ءساتى ءتۇسىپ قالىپتى. ۆيدەودا بالالاردىڭ ونى ارتىنان قاتتى ەكپىنمەن تەربەتىپ جاتقانى كورىنەدى. جەرگە قۇلاعان ساتتە باسىنان اۋىر جاراقات العان. جەدەل جاردەم كەلگەنشە كوز جۇمدى.
«دياگنوزى اشىق باس ميىنىڭ جاراقاتى, باس نەگىزىنىڭ اشىق جاراقاتى, وڭ جاق قابىرعاسىنىڭ جابىق سىنىعى, گەموتورسپەن ءومىر سۇرۋگە مۇمكىنشىلىگى جوق جاراقات», — دەدى وبلىستىق جەدەل جاردەم بەكەتى باس دارىگەرىنىڭ ورىنباسارى گۇلماراش بالماعامبەتوۆا.
قايعىلى جاعداي بولعان ساتتە اباتتىڭ اكەسى باسقا بالاسىمەن اۋرۋحانادا جاتقان. ال اناسى ۇلىنىڭ قازا بولعانىنا ءالى سەنە الار ەمەس. ءاليا ساعىندىقوۆا – توعىز جاسار ابات رۋسلاننىڭ اناسى, مۇگەدەكتەر ارباسىنا تاڭىلعان. ول وقيعا تۋرالى ەستىگەندە, ءۇيدىڭ كىرەبەرىسىنەن شىعا الماعان, ويتكەنى ءۇيدىڭ پاندۋسقا شىعۋعا ارنالعان ەسىگى ق ۇلىپتاۋلى.
«سونشاما تەربەتكەن عوي. ۇشقان. قايتادان تۇرعاندا قۇلاعان عوي. مەن كورشىلەرگە جالىندىم مىنا جاقتان تۇسە الماي جاتىرمىن. ەسىكتەردى اششى دەپ. شىقسام كىرە المايمىن. بالام بارىنە كومەكتەسەتىن ەدى. بالام شىعىپ كەتتى عوي. «ماما قازىر كەلەم, ويناپ كەلەمىن»دەپ, قولقاناتىم ەدى», — دەيدى بالانىڭ اناسى ءاليا ساعىندىقوۆا.
ابات 4 سىنىپتا وقىعان. كاسىبي تۇردە كاراتەمەن اينالىسقان. وتە بەلسەندى, ساباقتا وزات وقۋشى دەيدى ۇستازدارى.
«بالا ءوزى ساباقتى جاقسى وقيتىن. تولىق وتباسىنىڭ بالاسى عوي. ۇيىندە اناسى, اكەسى, ءىنىسى بار. وسىنداي جاعدايعا ۇشىراپ قالىپ وتىرمىز. مەكتەپتىڭ اتىنان جاقىندارىنا قايعىرىپ كوڭىل ايتامىز», — دەدى قىزىلجار ورتا مەكتەبى ديرەكتورىنىڭ ورىنباسارى تايبەك ابدۋللين.
ايتا كەتەيىك, وسى وقيعاعا قاتىستى «قاۋىپسىزدىك تالاپتارىنا ساي كەلمەيتىن تاۋارلاردى شىعارۋ نەمەسە ساتۋ, جۇمىستاردى ورىنداۋ نە قىزمەتتەر كورسەتۋ» بابىمەن ءىس قوزعالدى. قازىر تەرگەۋ-تەكسەرۋ ءجۇرىپ جاتىر.
