«كوشەنى تۇزۋلەپ ءبىر قىرىپ وتسە بولار ەدى»: نازىم قىزايباي تۇراتىن كوشەدە اسفالت جوق

فوتو: اشىق دەرەككوز

پاريج وليمپياداسىنىڭ چەمپيونى ەلدوس سمەتوۆ تۇراتىن كوشەگە اسفالت توسەلىپ, سپورتشىنى كۇتىپ الۋعا تىڭعىلىقتى دايىندىق جۇرگىزىلگەن بولاتىن, دەپ حابارلايدى Alash.KZ.

وسىدان سوڭ وڭىرلەردەگى كوشەلەر جوندەلۋى ءۇشىن سپورتشى چەمپيون اتانۋى كەرەك دەگەن ازىلدەر پايدا بولدى.

ال جۋرناليست نۇرسەيىت جىلقىشىباي الەۋمەتتىك جەلىدەگى پاراقشاسىندا:

«اكىمدىكتىگەلەر نۇربەك ورالباي مەن نازىم قىزايبايدىڭ كوشەلەرىن جوندەي بەرسە بولا ما?» دەپ ساۋال تاستاعان. بۇعان بوكسشى بويجەتكەن نازىم ءوزى پىكىر قالدىرىپتى.

«قاتتى قۋانار ەدىم. اسفالت توسەمەي-اق, تىم قۇراعاندا كوشەنى تۇزۋلەپ ءبىر قىرىپ وتسە بولار ەدى», – دەپ جازعان قىزايباي.

سپورتشىنىڭ بۇل سوزدەرىنىڭ سكرينىن ءتىلشى جەلىدە جاريالاپ, «اكىمدىكتەگىلەر نازىم قىزايبايدىڭ كوشەسىمەن ءبىر ءجۇرىپ ءوتسىن بە? بۇيىرتسا, التىن الىپ جاتسا, ۇيالىپ قالماسىن دەگەنىم عوي…» – دەپ جازبا قالدىردى.

ايتا كەتەيىك, نازىم الماتى قالاسىنان 47 شاقىرىم جەردەگى – الماتى وبلىسىنىڭ ىلە اۋدانىنا قاراستى جەتىگەن اۋىلىندا دۇنيەگە كەلگەن.
بۇگىن ول فينال جولداماسىن ساراپقا سالادى.