«Kósheni túzýlep bir qyryp ótse bolar edi»: Nazym Qyzaıbaı turatyn kóshede asfalt joq

Foto: ashyq derekkóz

Parıj Olımpıadasynyń chempıony Eldos Smetov turatyn kóshege asfalt tóselip, sportshyny kútip alýǵa tyńǵylyqty daıyndyq júrgizilgen bolatyn, dep habarlaıdy Alash.KZ.

Osydan soń óńirlerdegi kósheler jóndelýi úshin sportshy chempıon atanýy kerek degen ázilder paıda boldy.

Al jýrnalıst Nurseıit Jylqyshybaı áleýmettik jelidegi paraqshasynda:

«Ákimdiktigeler Nurbek Oralbaı men Nazym Qyzaıbaıdyń kóshelerin jóndeı berse bola ma?» dep saýal tastaǵan. Buǵan boksshy boıjetken Nazym ózi pikir qaldyrypty.

«Qatty qýanar edim. Asfalt tósemeı-aq, tym quraǵanda kósheni túzýlep bir qyryp ótse bolar edi», – dep jazǵan Qyzaıbaı.

Sportshynyń bul sózderiniń skrınin tilshi jelide jarııalap, «Ákimdiktegiler Nazym Qyzaıbaıdyń kóshesimen bir júrip ótsin be? Buıyrtsa, altyn alyp jatsa, uıalyp qalmasyn degenim ǵoı…» – dep jazba qaldyrdy.

Aıta keteıik, Nazym Almaty qalasynan 47 shaqyrym jerdegi – Almaty oblysynyń Ile aýdanyna qarasty Jetigen aýylynda dúnıege kelgen.
Búgin ol fınal joldamasyn sarapqa salady.