كوشپەندىلەر ويىندارى: 9 قىركۇيەككە ارنالعان سايىستار كەستەسى جاريالاندى

فوتو: استانا قالاسىنىڭ اكىمدىگى

V دۇنيەجۇزىلىك كوشپەندىلەر ويىندارىنىڭ 9 قىركۇيەككە ارنالعان ويىن كەستەسى جاريالاندى, دەپ حابارلايدى Halyq Uni.

سونىمەن, بۇگىن كوكپاردان 9 مەملەكەتتىڭ سپورتشىلارى ءوزارا مىقتىنى انىقتايدى. بۇل سپورت تۇرىنەن بارلىعى 104 سپورتشى قاتىسادى. كوكپاردان باق سىنايتىن قۇرامالار: قازاقستان, اقش, رەسەي, وزبەكستان, قىرعىزستان, ماجارستان, قىتاي, موڭعوليا جانە تۇركيا. جارىس «قازانات» يپپودرومىندا وتەدى.

ال يپپودروم ماڭىنداعى ەتنواۋىلدا وتەتىن اۋدارىسپاققا 9 مەملەكەتتەن 64 سپورتشى تىركەلگەن. ولار: قازاقستان, قىرعىزستان, وزبەكستان, موڭعوليا, تۇركيا, ماجارستان, قىتاي, اقش جانە رەسەي. قازاقستان نامىسىن ەرمەك قۇرالباي, المات لاتىپبەك, دارىن وتكەلباي, ەسىمحان ءراحماتىللا, سىرىم ءىزباساروۆ جانە ءبىرجان قوساليەۆ قورعايدى.

«ارعىماق» ات-سپورت كەشەنىندە ءداستۇرلى ساداق اتۋدان جارىس باستالادى. 33 مەملەكەتتەن 183 سپورتشى باق سىنايدى. قازاقستان قۇراماسى ساپىنان 10 سپورتشى قاتىسادى. جارىس ءۇش ءتۇرلى نىسانا نەگىزىندە وتكىزىلەدى. ولار – پۋتا نىساناسى 70/60 مەتر (9 وقتان 7 مۇمكىندىك), قالقان نىساناسى 60/50 مەتر (7 وقتان 7 مۇمكىندىك), جامبى نىساناسى 30 مەتر (5 وقتان 5 مۇمكىندىك) جانە كوماندالىق جارىس (30 مەتر).

قازاق كۇرەسى جاقسىلىق ۇشكەمپىروۆ اتىنداعى جەكپە-جەك سارايىندا وتەدى. كوشپەندىلەر ويىندارىنا قازاق كۇرەسىنەن 41 مەملەكەتتەن 274 سپورتشى قاتىسادى. بۇل سپورت تۇرىنەن ەرلەر مەن ايەلدەردىڭ ارقايسىسى 8 سالماق دارەجەسىندە سىنعا تۇسەدى.

«الاۋ» مۇز ايدىنى سارايىندا وتەتىن كۋراشقا 27 مەملەكەتتەن 106 سپورتشى قاتىسادى. اتالعان سپورت تۇرىنەن بالۋاندار ەرلەر اراسىندا 5 سالماقتا, ايەلدەر اراسىندا 3 سالماق دارجەسىندە بەلدەسەدى. ەل نامىسىن 8 سپورتشى قورعايدى. ولار – ەرنۇر سۇلەيمەن, ايبەك قازاقباەۆ, ءنۇردىن شايمەردەن, بەكادىل شايمەردەنوۆ, مارات بايكامۋروۆ, التىناي نۇرحانوۆا, اجار سالىقوۆا جانە البينا باحيەۆا. ايتا كەتەيىك, كۋراش سپورتى ەكى جارىس كۇنىنە بولىنگەن.

ساحا حالقىنىڭ ۇلتتىق سپورتى ماس-رەستلينگتەن جارىسقا 31 مەملەكەتتەن 98 سپورتشى قاتىسادى. اتالعان سپورت تۇرىنە قازاقستان ۇلتتىق قۇراماسى اتىنان 8 سپورتشى سىنعا تۇسەدى. ولار – تەمىرلان شامەت, اسىلمۇرات ءبىرىمجان, ۆلاديسلاۆ گەراسيموۆ, بەردىقۇل التاي, ەركەبۇلان ەرلان, جانسايا راحمەتۋللاەۆا, تاحمينا گوجامبەرديەۆا جانە ولگا دۋشاەۆا. ماس-رەستلينگ سپورتىنان باسەكە ەكى كۇن بولادى.

بۇگىن اسىق اتۋدان سىنعا تۇسەتىن سپورتشىلار دا جەرەبە تارتىپ, قارسىلاستارىن انىقتادى. ولار دا 9 قىركۇيەكتە «الاۋ» مۇز ايدىنى سارايىندا باسەكەگە تۇسەدى. اسىق اتۋدان 12 مەملەكەتتەن كەلگەن 39 سپورتشى ءوزارا مىقتىنى انىقتايدى. اسىق اتۋدان ەل نامىسىن 8 اسىق اتۋشى قورعايدى. ولار – نۇرقيسسا مولجىگىتوۆ, جومارت نۇرلانوۆ, كەرىم جازدىقباي, اماندوس ايتقۇلوۆ, پەريزات ەلەمەس, كاميلا دانياروۆا, سانيا اسكەر جانە كوگەرشىن دۋمان.

فينالدىق ويىندار 11 قىركۇيەكتە وتەدى.