كوشپەندىلەر ويىنىنان كەيىن قازاق حالقىن بالاعاتتاعان قىرعىز ازاماتى ۇستالدى

ۆيدەودان سكرينشوت: kaktus.media

ول قاتەلىك جىبەرگەنىن ءتۇسىنىپ, كەشىرىم سۇراعان.

استانادا وتكەن V دۇنيەجۇزىلىك كوشپەندىلەر ويىنىنىڭ كوكپار سايىسىنان كەيىن قازاق-قىرعىز جانكۇيەرلەرى اراسىندا ۇلكەن داۋ تۋعانى بەلگىلى. «فينال ادىلەتسىز ءوتتى» دەگەن قىرعىزستاندىقتار الەۋمەتتىك جەلىدە قازاقستان كوكپارشىلارىنان باستاپ ءبۇتىن ءبىر حالىقتى بالاعاتتادى. سولاردىڭ ءبىرىن كۇنى كەشە قىرعىزستان قاۋىپسىزدىك قىزمەتى ۇستاپ, كوپشىلىك الدىندا كەشىرىم سۇراتتى, دەپ حابارلايدى Qandastar.kz 1bol.kz سىلتەمە جاساپ.

ۇستالعان ازامات الەۋمەتتىك جەلىدە قازاقستاننىڭ تۋىن لاقتىرىپ, مەملەكەتتىك ءرامىزدى قورلاعان. بۇل ءوز كەزەگىندە مىڭداعان ادامنىڭ اشۋىن تۋدىردى.

ەكى ەلدىڭ اراسىنا وت سالىپ, ارانداتقان جاس جىگىتتىڭ ۇستالعانىن قىرعىزستان ۇلتتىق قاۋىپسىزدىك مەملەكەتتىك كوميتەتى مالىمدەگەن. 21 جاستاعى ازامات ۆيدەوكامەرا الدىندا ەكى ەلدەن دە كەشىرىم سۇراپ, ءوز قاتەلىگىن مويىندادى.

ايتا كەتەتىن جايت, قازاق پەن قىرعىز كوكپارشىلارىنىڭ فينالدىق ويىنىندا قوسىمشا ۋاقىتتا قازاقستان قۇراماسى جەڭىسكە جەتتى. وسىدان كەيىن قارسىلاس كوماندا نارازىلىق ءبىلدىرىپ, ماراپاتتاۋ راسىمىندە قازاقستاننىڭ ءانۇرانىن تىڭداماي كەتىپ قالدى. ارتىنشا ولار قازاق كوكپارشىلارىن قارىمتا ماتچ وتكىزۋگە شاقىرعانىمەن, ءبىزدىڭ ەلدىڭ كوكپارشىلارى بۇل ۇسىنىستان باس تارتتى.