Kóshpendiler oıynynan keıin qazaq halqyn balaǵattaǵan qyrǵyz azamaty ustaldy

vıdeodan skrınshot: kaktus.media

Ol qatelik jibergenin túsinip, keshirim suraǵan.

Astanada ótken V Dúnıejúzilik Kóshpendiler oıynynyń kókpar saıysynan keıin qazaq-qyrǵyz jankúıerleri arasynda úlken daý týǵany belgili. «Fınal ádiletsiz ótti» degen qyrǵyzstandyqtar áleýmettik jelide Qazaqstan kókparshylarynan bastap bútin bir halyqty balaǵattady. Solardyń birin kúni keshe Qyrǵyzstan qaýipsizdik qyzmeti ustap, kópshilik aldynda keshirim suratty, dep habarlaıdy Qandastar.kz 1bol.kz silteme jasap.

Ustalǵan azamat áleýmettik jelide Qazaqstannyń týyn laqtyryp, memlekettik rámizdi qorlaǵan. Bul óz kezeginde myńdaǵan adamnyń ashýyn týdyrdy.

Eki eldiń arasyna ot salyp, arandatqan jas jigittiń ustalǵanyn Qyrǵyzstan Ulttyq qaýipsizdik memlekettik komıteti málimdegen. 21 jastaǵy azamat vıdeokamera aldynda eki elden de keshirim surap, óz qateligin moıyndady.

Aıta ketetin jaıt, qazaq pen qyrǵyz kókparshylarynyń fınaldyq oıynynda qosymsha ýaqytta Qazaqstan quramasy jeńiske jetti. Osydan keıin qarsylas komanda narazylyq bildirip, marapattaý rásiminde Qazaqstannyń ánuranyn tyńdamaı ketip qaldy. Artynsha olar qazaq kókparshylaryn qarymta match ótkizýge shaqyrǵanymen, bizdiń eldiń kókparshylary bul usynystan bas tartty.