ءبىلىم
قوستاناي وبلىسىندا قازا تاپقان مۇعالىمدەر تۋرالى دەرەك شىقتى
بۇعان دەيىن جانتۇرشىگەرلىك اپاتتان 3 ادامنىڭ جان تاپسىرعانى بەلگىلى بولعان.
قوستاناي وبلىسىندا كولىك اپاتىنان كوز جۇمعان مۇعالىمدەر تۋعان-تۋىستارىن كورۋگە اسىققان, دەپ حابارلايدى qandastar.kz
16 جەلتوقساندا قوستاناي – اۋليەكول – سۇرعان تاسجولىندا جانتۇرشىگەرلىك جول اپاتىنان ءۇش ادام قازا تاپقان ەدى, ونىڭ ەكەۋى پەداگوگ بولىپ شىقتى.
«مۇعالىمدەر مەيرام كۇنى اعايىن-تۋعانىمەن كورىسۋگە جول تارتقان», – دەدى قوستاناي وبلىسى ءبىلىم باسقارماسىنان.
ەسكە سالايىق, قاراسۋ اۋدانى گەرتسەن اۋىلىنان 10 شاقىرىم جەردە Volvo مەن Toyota Alphard كولىكتەرى سوقتىعىسقان. اپاتتان ءۇش جولاۋشى قازا تاۋىپ, تاعى ۇشەۋى اۋليەكول اۋداندىق اۋرۋحاناسىنا جاتقىزىلدى.
قوستاناي وبلىسى ءبىلىم باسقارماسىنىڭ ءباسپاسوز قىزمەتى جكو-دا مۇعالىمدەردىڭ قازا تاپقانىن راستادى.
«16 جەلتوقساندا قوستاناي وبلىسىنىڭ اۋماعىندا جول اپاتىنان ەكى پەداگوگ قازا تاپقانىن قايعىرا حابارلايمىز. قوستاناي اۋدانى زارەچنىي مەكتەپ-ليتسەيىنىڭ ورىس ءتىلى مەن ادەبيەتى ءپانىنىڭ مۇعالىمى, سونداي-اق التىنسارين اۋدانى ۇلكەن-چۋراكوۆ جالپى ءبىلىم بەرەتىن مەكتەبىنىڭ پەداگوگ-پسيحولوگى قوستاناي – اۋليەكول – سۇرعان تاسجولىندا اپاتتان قازا تاپتى. تۋىستارى مەن جاقىندارىنا كوڭىل ايتامىز», – دەدى وبلىستىق باسقارمادان.
