قوستاناي وبلىسىندا قۇتقارۋ جۇمىستارى جالعاسىپ جاتىر

قوستاناي وبلىسىندا توتەنشە جاعداي جاريالانعالى بەرى 8 مىڭعا جۋىق ادام قاۋىپسىز جەرگە كوشىرىلدى. ونىڭ 1 مىڭ 200-دەن استامى بالا.

ەۆاكۋاتسيالانعاندار سانى كۇن سايىن كوبەيىپ جاتىر. قالادا كولىك قوزعالىسى قيىندادى. قوستاناي وبلىسىنداعى جاعداي ءالى دە ءماز ەمەس. توبىل وزەنىندە سۋ دەڭگەيى كوتەرىلىپ, قالا ماڭىنداعى اۋىلدارعا زاردابىن تيگىزۋدە. سالدارىنان جەرگىلىكتى تۇرعىندار ۇيلەرىن تاستاپ, قاۋىپسىز ايماقتارعا كەتۋگە ءماجبۇر.      قازىر وبلىستا 135 ەۆاكۋاتسيالىق ورتالىق جۇمىس ىستەپ تۇر. وسىندا ورنالاسقانداردىڭ دەنساۋلىعى, پسيحولوگيالىق جاعدايى ۇنەمى باقىلاۋدا. تاۋلىك بويى ارنايى ماماندار كەزەكشىلىككە شىعادى. ال قالا ماڭىنداعى مەكتەپ وقۋشىلارى قاشىقتان وقيدى.

قوستاناي مەن توبىل قالالارىن جالعايتىن ورتالىق كوپىردە بۇگىن ۇزىن سونار كەپتەلىس بولدى. اۋىر جۇك كولىكتەرىنىڭ قوزعالىسى شەكتەلدى. سەرىك ومىرزاق ۇلى, وبلىس تۇرعىنى: — 2-3 كۇن بۇرىن ۇسىنىس جاسادى سۋ كەلەدى دەپ. سەندەر باقىلاڭدار, ابايلاڭدار دەپ. سوسىن تۇنىمەن كۇتتىك, تاڭەرتەڭ قاراساق سۋ كوتەرىلگەن. جول بويىنشا كوشەلەردىڭ ءبارىن جيناپ, وسىندا جۇمىس ىستەپ جاتىرمىن ۆولونتەر سياقتى. كارينا بازارباەۆا, وبلىستىق پد ءباسپاسوز حاتشىسى: — ورتالىق كوپىردە ەرىگەن قار سۋىن توقتاتۋ ءۇشىن قاپشىقتارمەن بوگەۋ جۇمىستارى جۇرگىزىلىپ جاتىر. وسىندا قازىر پوليتسەيلەر, ەرىكتىلەر, كۋرسانتتار وسى جەردە جۇمىس ىستەپ جاتىر. جاعالاۋعا جاقىن ورنالاسقان ساۋدا ورتالىقتارى مەن سپورت كەشەندەرىن دە سۋ باسقان.    الميرا شين, وبلىستىق تجد رەسمي وكىلى: — تۇرعىنداردان سابىر ساقتاۋدى وتىنەمىز. قازىر ماماندار قولدان كەلگەننىڭ ءبارىن جاساپ جاتىر. ەگەر قيىن جاعدايعا تاپ بولساڭىز 109 نەمەسە 112 نومىرلەرىنە حابارلاسىپ, كومەك سۇراڭىزدار. وبلىستا سۋ تاسقىنى باستالعالى تۇرعىنداردى ەۆاكۋاتسيالاۋ مەن تاسقىنعا قارسى جۇمىستارعا 2 مىڭنان استام ادام, 390 تەحنيكا, 29 سۋ قۇرالى مەن 3 تىكۇشاق جۇمىلدىرىلدى.