Qostanaı oblysynda mektep qabyrǵasy opyryldy

Qostanaı oblysyndaǵy Novonejın aýylynyń turǵyndary redakııamyzǵa mektep ǵımaratynyń qabyrǵasy qıraǵan vıdeony joldady. Jergilikti ákimdik pen merdiger uıym ókilderi oqıǵanyń mán-jaıyn aıtty, dep habarlaıdy KAZ.NUR.KZ tilshisi.

Bul mektepte 300-den astam oqýshy bilim alady. Abyroı bolǵanda, mekteptiń 3-qabattaǵy qabyrǵasynyń bir bóligi senbide qırap qalǵan. Bul kúni oqýshylar demalysta boldy. Qostanaı oblystyq ákimdigi qoǵamdyq basqarý basqarmasynyń málimetinshe, mektepte balalar men muǵalimder bolǵan joq, zardap shekkender joq. Jergilikti jerde komıssııa jumys istep jatyr, qysqa merzimde tehnıkalyq tekserý júrgizilip, qorytyndy shyǵarylady. Novonejın jalpy bilim beretin mektebiniń ǵımaratyn kúrdeli jóndeý 2024 jylǵy maýsymnan bastap júrip jatyr. «Jóndeý jumystary merzimderiniń buzylýyna jol berip otyrǵan qurylys merdigeri «PKF GRENADA» JShS. Merdigerdiń atyna narazylyq notasy joldandy jáne ónim berýshini memlekettik satyp alýdyń josyqsyz qatysýshysy dep taný úshin sotqa materıaldar daıyndalyp jatyr», – dep jazǵan ákimdik taratqan aqparatta.

Kináli adamdar jaýapqa tartylatyny aıtylady. Oqýshylar qashyqtan oqytýǵa aýystyryldy. Ata-analar buǵan deıin bul mektepte oqý qaýipti ekenin aıtyp, dabyl da qaqty. «Munda jóndeý jumys júrip jatqanda sabaqtardy oqý balalar úshin tym kóp qaýipti. Balanyń basyna ne ústine joǵarydan bir nárse qulap ketpesine eshkim de, muǵalim de kepildik bermeıdi», – deıdi Novonejın aýylynyń turǵyny Dınara Sadýaqasova.

Qurylys júrip jatqan jerde balalardyń júrgenine merdiger kompanııa da qarsy bolǵan. Alaıda, jergilikti bıliktiń aıtqanynan shyǵa almaǵan. Olar birinshi qabattan birneshe kabınetti 1-nshi qyrkúıekke deıin jóndep berýdi surapty. 5-9-synyp oqýshylary sonda bilim alyp jatyr. Al, bastaýysh synypty mektep aýlasyndaǵy bala-baqshaǵa ornalastyrǵan.

«Biz únemi salynyp bitpegen nysanǵa balabaqsha, aýrýhana, mektep ornalasqanyna qarsymyz. Bul qurylys alańy, sondyqtan mundaǵy qaýipsizdikke eshkim kepildik bere almaıdy. Onyń ústine munda balalar bolady. Árıne, qarsy bolsaq ta, suraǵandaryn jasap berdik. Bir qanatyn bólip, dálizdi japtyq, bólek kiretin esik jasadyq», – deıdi merdiger kompanııanyń bas dırektory Anatolıı Gromchenko.