جاڭالىقتار
قوستاناي وبلىسىندا جانىپ جاتقان ۇيدەن ەر ادام قۇتقارىلدى
قوستاناي وبلىسىندا پوليتسيا قىزمەتكەرلەرى ەر ادامدى جانىپ جاتقان عيماراتتان الىپ شىقتى, دەپ حابارلايدى Qandastar.kz.
13 شىلدە كۇنى تۇنگى ساعات 03:09 شاماسىندا التىنسارين اۋدانى, ششەرباكوۆ كەنتىندە بولعان. بوس تۇرعان عيماراتتىڭ شاتىرىنان ءورت شىققان.
وقيعا ورنىنا دەرەۋ ءورت ءسوندىرۋ توبى اتتانعان. ارادا ءبىراز ۋاقىت وتكەندە ۋچاسكەلىك پوليتسيا ينسپەكتورلارى دۋلات نۇرۋموۆ پەن امانتاي كەنجەباەۆ بارعان. تەكسەرۋ بارىسىندا ولار قويۋ ءتۇتىننىڭ ىشىندە ۇيىقتاپ جاتقان ەر ادامدى بايقاپ قالادى. ۋاقىت جوعالتپاي, ونى قاۋىپتى ايماقتان شىعارىپ, ءومىرىن ساقتاپ قالدى.
پوليتسيا قىزمەتكەرلەرىنىڭ جانقيارلىعى مەن ءورت سوندىرۋشىلەردىڭ جەدەل ارەكەتتەرى ارقاسىندا قايعىلى جاعدايدىڭ الدىن الۋعا مۇمكىندىك تۋدى. ەر ادام ەشقانداي جاراقات المادى جانە دارىگەرلەرگە تەكسەرىلۋ ءۇشىن تاپسىرىلدى.
