قوستانايدا اكىمدىك ورتەندى

فوتو: تجد

قوستاناي وبلىسى قاراسۋ اۋدانى ايدارلى اۋىلىنداعى اكىمدىك عيماراتى ورتەنىپ كەتتى. قازىر ءورت سوندىرۋشىلەر قىزىل جالىنمەن ارپالىسىپ جاتىر, – دەپ جازادى qandastar.kz Aikyn.kz-كە سىلتەمە جاساپ. 

ۆەدومستۆو ءباسپاسوز قىزمەتىنىڭ حابارلاۋىنشا, 101 پۋلتىنە ەكى قاباتتى عيماراتتىڭ ورتەنىپ جاتقانى تۋرالى اقپارات كەلىپ تۇسكەن. وقيعا ورنىنا تەز ارادا ءورت سوندىرۋشىلەر جەتكەن.

«ەلدى مەكەننىڭ اۋدان ورتالىعىنان شالعايدا ورنالاسۋى, ال اعاشتان تۇرعىزىلعان عيماراتتىڭ تەز تۇتانۋى جۇمىستى قيىنداتتى. ءورت شاتىرعا قاراي ويىسقان. قويۋ ءتۇتىن, اۋا تەمپەراتۋراسىنىڭ تومەندىگى جانە جەلدى اۋا رايى دا قيىندىق تۋدىرىپ, جالىن كورشىلەس عيماراتتاردى شارپۋ قاۋپى تۋىندادى», – دەيدى تجم وكىلدەرى.

بۇل قيىندىقتارعا قاراماستان, ءورت 100 شارشى مەترگە جەتكەندە اۋىزدىقتالعان.

عيماراتتىڭ جالپى اۋدانى 250 شارشى مەتر. ءورت سوندىرۋشىلەرى عيماراتتىڭ تولىقتاي ورتەنىپ كەتۋىن بولدىرماي, جاقىن ماڭدا ورنالاسقان باسقا عيماراتتاردى ورتتەن ساقتاپ قالدى. زارداپ شەككەندەر جوق. ءورتتىڭ سەبەپتەرى انىقتالىپ جاتىر.