قوستانايدا بالا ماگنيتتى جۇتىپ كوز جۇمدى: دارىگەرلەردىڭ ۇستىنەن قىلمىستىق ءىس قوزعالدى

قوستاناي وبلىسىندا ءۇش جاسار بالا 10 ماگنيتتى جۇتىپ قويعان. اۋرۋحاناعا جەتكىزىلگەن بالا سول جەردە كوز جۇمدى. ءبىر ايدان كەيىن دارىگەرلەردىڭ ۇستىنەن قىلمىستىق ءىس قوزعالدى, دەپ حابارلايدى KYN.KZ اقپارات اگەنتتىگى.

بۇل تۋرالى ادۆوكات دامير حاميتوۆ  Facebook پاراقشاسىندا مالىمدەدى. ول ەندىگىدە پوليتسەيلەردىڭ سوتقا دەيىنگى تەرگەۋدى باستاۋىنا تولىق نەگىز بارىن ايتتى.

«كىشكەنتاي ساشانىڭ 10 ماگنيت جۇتىپ قويعان ولىمىنە قاتىستى دارىگەرلەرگە قاتىستى قوستاناي قالاسىنىڭ سولتۇستىك پوليتسيا بولىمىندە قك-ءنىڭ 317-بابىنىڭ 3-بولىگىمەن تجد-دا قىلمىستىق ءىستىڭ تىركەلۋىنە قول جەتكىزدىك. ەندى سوت-مەديتسينالىق ساراپتاماسى مەن فارماتسەۆتيكالىق باقىلاۋ كوميتەتىنىڭ قورىتىندىسى نەگىزىندە ءتيىستى مەديتسينالىق كومەك كورسەتپەگەن دارىگەرلەرگە قاتىستى تەرگەۋ امالدارى جۇرگىزىلمەك. بالا ولىمىنە كىنالىلەر جازاسىن الۋى كەرەك!», – دەدى ول.

حاميتوۆ مەديتسينالىق جانە فارماتسەۆتيكالىق باقىلاۋ كوميتەتىنىڭ دەپارتامەنتى ءولىم فاكتىسى بويىنشا تەكسەرۋ جۇرگىزىپ, بالاعا «بالالارداعى وڭەشتىڭ بوگدە دەنەسىن» دياگنوستيكالاۋ مەن ەمدەۋدىڭ كلينيكالىق حاتتامالارىن بۇزا وتىرىپ, مەديتسينالىق كومەك كورسەتىلگەنىن انىقتاعانىن ايتتى.

ەسكە سالساق, بۇعان دەيىن ەمدەۋ مەكەمەسىنىڭ حيرۋرگيالىق قىزمەتىنىڭ باسشىسى ناۋقاستى ەمدەۋ كەزىندە دارىگەرلەردىڭ قانداي ارەكەتكە بارعانىن ايتقان بولاتىن.

كەيىنىرەك بالانىڭ اناسى بولعان وقيعاعا قاتىستى ءوز پىكىرىن ءبىلدىردى.