قوستانايدا جەدەل جاردەم قىزمەتكەرى سوققىعا جىعىلدى

فوتو:  Gov.kz

قوستاناي قالاسىندا جەدەل جاردەم قىزمەتىنىڭ فەلدشەرى انەل بايمۋرزينا جۇمىس بارىسىندا ناۋقاستىڭ تۋىستارىنىڭ شابۋىلىنا ۇشىراپ, اۋرۋحاناعا جەتكىزىلدى, دەپ حابارلايدى qandastar.kz  Alau.kz پورتالىنا سىلتەمە جاساپ حابارلايدى.

انەل بايمۋرزينا تۇنگى اۋىسىمدا «دەمىكپە, جۇرەك» دياگنوزىمەن تۇسكەن شاقىرتۋ بويىنشا بارعان. الايدا, ول بارعان ۇيدە ناۋقاستىڭ قىزدارى قىزمەتكەرلەرگە اگرەسسيا كورسەتكەن.

ء«بىز العاشقى كومەك كورسەتىپ جاتقاندا, ولار جۇمىسىمىزعا كەدەرگى جاساپ, ءبىزدى قارعاپ, دۇرىس ىستەمەسەك, تۇرمەگە وتىرعىزامىز دەپ قورقىتتى. ناۋقاستىڭ جۇرەگى توقتاپ قالعان سوڭ, رەانيماتسيالىق شارالارعا كىرىستىك. 30 مينۋت بويى كۇرەسكەنىمىزبەن, ونى امان الىپ قالا المادىق. ولارعا كوڭىل ايتقانىمىزدا, كۇتپەگەن جەردەن شابۋىل جاسالدى», – دەيدى انەل بايمۋرزينا.

فەلدشەردىڭ ايتۋىنشا, ناۋقاستىڭ قىزدارى ونى ۇرىپ-سوعىپ, شاشىنان سۇيرەپ, قاتتى جاراقاتتاعان. جانىنداعى ەكىنشى فەلدشەر مەن جۇرگىزۋشى ونى قورعاۋعا تىرىسقانىمەن, اشۋلى ايەلدەردى توقتاتا الماعان. تەك كورشىلەردىڭ ارالاسۋىمەن جاعداي تۇراقتالعان.

انەل بايمۋرزيناعا «مي شايقالۋى», «ساماي ايماعىنىڭ گەماتوماسى» جانە «بەتىنىڭ جۇمساق تىندەرىنىڭ جاراقاتى» دەگەن دياگنوز قويىلىپ, اۋرۋحاناعا جاتقىزىلدى.

قوستاناي وبلىسى پوليتسيا دەپارتامەنتىنىڭ مالىمەتىنشە, وقيعاعا بايلانىستى قىلمىستىق ءىس قوزعالىپ, تەرگەۋ باستالعان.

«العاشقى مەديتسينالىق كومەك كورسەتۋ كەزىندە ءۇي يەلەرى مەن دارىگەرلەر اراسىندا جانجال تۋىنداعان. 41 جانە 51 جاستاعى ايەلدەر فەلدشەرگە دەنە جاراقاتىن سالعان», – دەپ حابارلادى پوليتسيا.

قازىرگى تاڭدا وقيعا بويىنشا سوت-مەديتسينالىق ساراپتاما تاعايىندالدى, تەرگەۋ جۇمىستارى «ۇرىپ-سوعۋ» بابى بويىنشا جالعاسۋدا.