قوستانايعا ساپار: پرەمەر-مينيستر ۋاقىت بەلدەۋىنە قاتىستى نە ايتتى?

فوتو: اشىق دەرەككوز

قوستاناي وبلىسىنا جۇمىس ساپارى بارىسىندا قر پرەمەر-ءمينيسترى ولجاس بەكتەنوۆ زاۋىتتار مەن كاسىپورىنداردى ارالاپ, ءوندىرىس باسشىلىعى جانە ۇجىمدارىمەن كەزدەسۋلەر وتكىزدى. ءوڭىردىڭ الەۋمەتتىك-ەكونوميكالىق دامۋ پەرسپەكتيۆالارى, كادرلىق الەۋەتتى ارتتىرۋ, ينفراقۇرىلىمدىق مىندەتتەردى شەشۋ بارىسى تالقىلاندى, دەپ جازدى qandastar.kz

سونداي-اق بىرىڭعاي ۋاقىت بەلدەۋىنە كوشۋ ماسەلەسىنە دە نازار اۋدارىلدى. ءسوز سويلەۋشىلەردىڭ ايتۋىنشا, بىرىڭعاي ۋاقىت بەلدەۋىن ەنگىزۋ ماسەلەسىن قوستاناي وبلىسىنىڭ تۇرعىندارى بۇرىن دا كوتەرگەن, ويتكەنى 6-شى ۋاقىت بەلدەۋى تابيعي ۋاقىتقا سايكەس كەلمەدى. وسىلايشا, بىرىڭعاي ۋاقىت بەلدەۋىنە كوشۋ تۋرالى شەشىم كۇندەلىكتى تۇرمىستىق پروتسەستەردى جەڭىلدەتتى. وسىعان بايلانىستى كەزدەسۋگە قاتىسۋشىلار بىرىڭعاي ۋاقىت بەلدەۋىن قولداپ ءسوز سويلەدى. پرەمەر-مينيستر ولجاس بەكتەنوۆ تۇرعىندارمەن اڭگىمەلەسۋ بارىسىندا تابيعي ۋاقىتتىڭ ازاماتتاردىڭ دەنساۋلىعى مەن ءال-اۋقاتىنا وڭ اسەرى عىلىمي دالەلدەنگەنىنە نازار اۋداردى. 2017 جىلى امەريكالىق عالىمدار توبى ادامنىڭ تسيركادتىق ىرعاعىن زەرتتەگەنى ءۇشىن نوبەل سىيلىعىمەن ماراپاتتالدى, بۇل تابيعي ۋاقىتقا سايكەس ءومىر ءسۇرۋدىڭ ەڭ پايدالى ەكەنىن راستادى. وسى جۇمىستىڭ جانە باسقا دا عىلىمي زەرتتەۋلەردىڭ نەگىزىندە 2022 جىلى 80-نەن استام ەلدىڭ عالىمدارى مەن مەملەكەت قايراتكەرلەرى قول قويعان بارسەلونا دەكلاراتسياسى قابىلداندى.

پرەمەر-مينيستر قوستاناي وبلىسىنىڭ تۇرعىندارىنا جانە بارلىق قازاقستاندىقتارعا وسى ماڭىزدى شەشىمدى ءتۇسىنىپ, قولداعانى ءۇشىن العىسىن ءبىلدىردى.

«شەشىم قازاقستاندا عانا ەمەس, شەتەلدە دە جۇرگىزىلگەن وتە تەرەڭ عىلىمي زەرتتەۋلەر نەگىزىندە قابىلداندى. 2017 جىلى امەريكالىق عالىمدار توبى ادامنىڭ تسيركادتىق ىرعاعىن زەرتتەگەنى ءۇشىن نوبەل سىيلىعىمەن ماراپاتتالدى. بۇل زەرتتەۋدە عالىمدار تابيعي ۋاقىتتا ءومىر سۇرگەن كەزدە ادام ءۇشىن ەڭ جاقسى جانە پايدالى ەكەنىن دالەلدەدى. سوندىقتان قازىر الەمنىڭ پروگرەسسيۆتى ەلدەرى تابيعي ۋاقىت بەلدەۋىنە كوشۋگە ۇمتىلۋدا. قازاقستان ءۇشىن تابيعي ۋاقىت بەلدەۋى – ءبىز قازىر ءومىر ءسۇرىپ جاتقان UتC+5 بولىپ تابىلادى. بۇرىن وزدەرىڭىز بىلەتىندەي, ءبىز باسقا UتC+6 بەلدەۋىندە بولدىق. كەزىندە ەلىمىز ديرەكتيۆالىق تارتىپتە ءبىز ءۇشىن تابيعي ەمەس بەلدەۋگە اۋىستىرىلدى. قازىر, كەرىسىنشە, ءبىز ۋاقىتتى كۇن تسيكلىنە سايكەس كەلتىردىك. مەن بىرىڭعاي ۋاقىت بەلدەۋىنە اۋىسۋ كەيبىر ادامدارعا ىڭعايسىزدىق تۋدىرۋى مۇمكىن ەكەنىن تۇسىنەمىن. اعزا بىرتىندەپ ۇيرەنەدى. وسىنداي شەشىم قابىلداندى. ەگەر وڭىرلەردە قانداي دا ءبىر قولايسىزدىقتار بولسا, ءبىزدىڭ ەڭبەك زاڭنامامىز مۇمكىندىك بەرەتىن ينفراقۇرىلىمدى, جارىقتاندىرۋدى, ىڭعايلى كەستەنى ۇيىمداستىرۋ ارقىلى جۇمىس ىستەۋ قاجەت. وسى ماسەلەلەردىڭ بارلىعىن ءارى قاراي شەشەتىن بولامىز», — دەپ اتاپ ءوتتى پرەمەر-مينيستر.

سونداي-اق زاۋىت ۇجىمىمەن كەزدەسۋ بارىسىندا مەملەكەت باسشىسى جاريالاعان الداعى جۇمىسشى ماماندىقتارى جىلى قارساڭىندا ەڭبەك جاعدايلارى جانە وزگە دە قولداۋ شارالارى ماسەلەلەرى كوتەرىلدى.