قوستانايلىق باپكەر 6 ميلليونعا جۋىق قارجىنى جىمقىرعان

فوتو: اشىق دەرەككوز

21 قازاندا قوستاناي وبلىسىنىڭ پروكۋراتۋراسى بيۋدجەت قاراجاتىن ۇرلاۋ تۋرالى قىلمىستىق ءىس بويىنشا ايىپتاۋ اكتىسىن بەكىتتى. بۇل تۋرالى باس پروكۋراتۋرا ءمالىم ەتتى, دەپ حابارلايدى qandastar.kz El.kz اقپارات اگەنتتىگىنە سىلتەمە جاساپ.

تەرگەۋ بارىسىندا 2022 جىلدىڭ قازانىنان 2024 جىلدىڭ قاڭتارىنا دەيىن قوستاناي وبلىسى اكىمدىگى دەنە شىنىقتىرۋ جانە سپورت باسقارماسىنىڭ «جوعارى سپورت شەبەرلىگى مەكتەبى» كمم بالالار مەن جاسوسپىرىمدەر كوماندالارى اراسىندا شورت-ترەك بويىنشا جاتتىقتىرۋشى ءوزىنىڭ قىزمەتتىك جاعدايىن پايدالانا وتىرىپ, الىمدار مەن جارىستارعا ءىس جۇزىندە بارماعان ادامداردى زاڭسىز كورسەتۋ جولىمەن شىعىنداردىڭ ناقتى سوماسىن ۇلعايتا وتىرىپ, جالعان اۆانستىق ەسەپتەر قۇراستىرعانى انىقتالدى, – دەلىنگەن اقپاراتتا.

جاتتىقتىرۋشى تۇسكەن اقشانى ءوزى الىپ وتىرعان. ۇرلانعان بيۋدجەت قاراجاتىنىڭ سوماسى 5,9 ملن تەڭگەنى قۇرادى. كەيىننەن ۇرلانعان اقشا قاراجاتىن دەپوزيتتىك شوتقا اۋدارۋ ارقىلى زاڭدى اينالىمعا تارتتى, ول جەردەن اي سايىنعى سىياقىنى 9,6% پايىزدىق مولشەرلەمەمەن الدى. دەپوزيت بويىنشا پايىزدىق سىياقى تۇرىندەگى جاريا ەتىلگەن قىلمىستىق كىرىس سوماسى 613,1 مىڭ تەڭگەنى قۇرادى.

ونىڭ ارەكەتتەرى قىلمىستىق كودەكستىڭ 189-بابىنىڭ 3-بولىگىنىڭ  1-تارماعى (سەنىپ تاپسىرىلعان بوتەن م ۇلىكتى قىزمەتتىك جاعدايىن پايدالانا وتىرىپ, ءىرى مولشەردە ۇرلاۋ) 218-بابىنىڭ 1-بولىگى (اقشانى زاڭداستىرۋ (جىلىستاتۋ), ياعني كونۆەرسيا تۇرىندە مامىلەلەر جاساۋ ارقىلى قىلمىستىق جولمەن الىنعان اقشالاي قاراجاتتى زاڭدى اينالىمعا تارتۋ) بويىنشا سارالانادى.

سانكتسيا باپپەن التى جىلعا دەيىنگى مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرا وتىرىپ, مۇلكى تاركىلەنىپ, جەتى جىلعا باس بوستاندىعىنان ايىرۋ تۇرىندەگى ەڭ جوعارى جازانى كوزدەيدى.

قىلمىستىق ءىس قوستاناي قالاسىنىڭ №2 سوتىنا جولداندى.