«كوزىمە ءشوپ سالدى»: استانادا بۇرىنعى قىزىن ولتىرگەن جىگىت قىلمىسقا نە سەبەپتى بارعانىن ايتتى

22 ماۋسىم كۇنى كەشكى ساعات 20:30 شاماسىندا استاناداعى «Millennium Park» تۇرعىن ءۇي كەشەنىندە قايعىلى وقيعا بولدى. كۇدىكتى بۇرىن جۇرگەن قىزىن بىرنەشە جەردەن پىشاقتاپ ءولتىرىپ, ونىڭ تۋعان باۋىرىن دا جارالاعان, دەپ حابارلايدى Qandastar.kz اقپارات پورتالى Azattyq Rýhy-نا سىلتەمە جاساپ.

بۇگىن الەۋمەتتىك جەلىدە پوليتسيا كۇدىكتىنى قالاي ۇستاعانى بەينەلەنگەن ۆيدەو تارادى.

بەينەجازبادا بىرنەشە پوليتسيا قىزمەتكەرى كۇدىكتىنى ۇستاپ, قولىن كىسەندەگەنىن بايقاۋعا بولادى. جىگىت قارسىلىق تانىتپاعان, وكىنىشسىز, مۇدىرمەستەن سۇراقتاردىڭ بارىنە جاۋاپ بەرىپ تۇر.

«قىزدى نە ءۇشىن ءولتىردىڭ?» دەگەن پوليتسيا قىزمەتكەرىنە «كوزىمە ءشوپ سالدى» دەپ وزبىر جاۋاپ بەرگەن.

«كىشكەنتاي قىز عوي» دەگەن پوليتسيانىڭ وزىنە جەكىپ «كەتسەڭ, ءوزىڭ كەت» دەپ بوقتايدى.

كامەلەتكە تولماعان ءىنىسى دە جاراقات العان

الدىن الا مالىمەتتەر بويىنشا, كۇدىكتى مارقۇمنىڭ بۇرىنعى جىگىتى. قىز پاتەردىڭ ىشىندە بىرنەشە پىشاق جاراقاتىمەن تابىلعان. كورشىلەردىڭ ايتۋىنشا, وقيعا الدىندا پاتەردەن قاتتى ايقاي-شۋ ەستىلگەن.

قاندى وقيعادان كەيىن كۇدىكتى كوشەگە شىعىپ, ءوتىپ بارا جاتقان ادامدارعا شابۋىل جاساعان. سول كەزدە قىزدىڭ باۋىرىن جارالاعان.

مارقۇمنىڭ جاراقات العان ءىنىسى 16 جاستا بولىپ شىقتى. بۇگىن قالالىق دەنساۋلىق ساقتاۋ باسقارماسى بالانىڭ جاعدايىنا قاتىستى اقپارات بەردى.

«2009 جىلى تۋعان ءجاسوسپىرىم جەدەل جاردەممەن ەكىنشى بالالار اۋرۋحاناسىنا ارقا ايماعىنداعى پىشاق جاراقاتىمەن ءتۇستى. اۋرۋحانانىڭ جەدەل حيرۋرگيا بولىمىنە جاتقىزىلدى. قازىر جاعدايى تۇراقتى», — دەپ مالىمدەدى استانانىڭ دەنساۋلىق ساقتاۋ باسقارماسى.