«كوزقاراستارىمىز سايكەس كەلمەيدى»: ميراس جۇگىنىسوۆ اعاسى رۇستەم ءۇشىن كەشىرىم سۇرادى

تانىمال حيتمەن ميراس جۇگىنىسوۆ اقتوبەدەگى مەشىتتە بولعان جانجالعا قاتىستى پىكىر ءبىلدىرىپ, باسى داۋعا قالعان اعاسىنا قاتىستى ويىن ءبولىستى, دەپ حابارلادى Qandastar.kz

ونەر يەسى جەكە پاراقشاسىندا جازبا جاريالادى.

“سوڭعى كۇندەرى اعامنىڭ ايتقان پىكىرى قوعامدا ۇلكەن رەزونانس تۋدىرىپ, كەيبىر جانداردىڭ كوڭىلىنە ءتيىپ جاتىر. ول ءوز ويىن بىلدىرگەن جەكە تۇلعا. مەن ءوز جولىم, ءوز ۇستانىمىم بار اداممىن. مەن وتباسىمنىڭ ءار مۇشەسىن قۇرمەتتەيمىن, بىراق ولاردىڭ جەكە كوزقاراستارى مەنىڭ ويىممەن ءاردايىم سايكەس كەلە بەرمەيدى. سول ءۇشىن دە كەيبىر كەزدە ماسەلەلەر تۋىندايدى. ولاردى وسىلاي ايتىپ وتىرامىن دەپ ويلامادىم. نە ايتقىم كەلگەنىن سىزدەر ءتۇسىنىپ وتىرسىزدار”, – دەپ باستادى اڭگىمەسىن ءانشى.

سوزىنشە, اندەرىنىڭ دەنى نازىك جاندىلارعا ارنالعاندىقتان, ارقاشان قىزعا قۇرمەت كورسەتۋ كەرەك ەكەنىن ەستەن شىعارماعان.

“مەنىڭ شىعارماشىلىعىم ادامعا قۇرمەت جايلى. نازىك جاندىلارعا ارنالعان اندەرىم دە بار. ويتكەنى ايەل ادامنىڭ ورنى مەنىڭ ومىرىمدە ەرەكشە. بۇل جاعدايدان كوڭىلى قالعان بارشا جاننان كەشىرىم سۇرايمىن. سىزدەردىڭ سەنىمدەرىڭىز مەن ءۇشىن وتە ماڭىزدى”, – دەپ جازدى ميراس.