قر پرەمەر-ءمينيسترىنىڭ ءبىرىنشى ورىنباسارى رومان سكليار اقتوبە وبلىسى تامدى اۋىلىنىڭ تۇرعىندارىمەن كەزدەستى

قر پرەمەر-ءمينيسترىنىڭ ءبىرىنشى ورىنباسارى رومان سكليار اقتوبە وبلىسىنا جۇمىس ساپارى بارىسىندا العا اۋدانى تامدى اۋىلىندا سۋ تاسقىنىنان قالىپتاسقان جاعدايدى تەكسەردى. وندا 2 مىڭنان استام ادام تۇرادى. كەشە ەلەك وزەنىنەن كەلگەن سۋ دامبىدان اسىپ, اۋىلعا كىرگەن.

رومان سكليارعا قۇتقارۋ جۇمىستارىنا 50-گە جۋىق ادام جۇمىلدىرىلىپ, 80 توننا ينەرتتى ماتەريال دايىندالعانى جونىندە باياندالدى. قازىر جاعداي قالىپتى. اۋلالارىنا سۋ كىرگەن ۇيلەرگە كومەك كورسەتىلدى.

اۋىل تۇرعىندارى رومان سكليارعا كەلەر جىلى سۋ تاسقىنىنىڭ الدىن الۋ ءۇشىن دامبىعا جوندەۋ جۇمىستارىن جۇرگىزىپ, ەلەك وزەنىنىڭ ارناسىن تازارتۋ كەرەكتىگىن ايتىپ, كومەك سۇرادى.

«سۋ تاسقىنىنا بايلانىستى احۋال پرەمەر-ءمينيستردىڭ جانە ۇكىمەتتىڭ تۇراقتى باقىلاۋىندا. بارلىق قاجەتتى شارالار قابىلدانادى. تابيعي اپاتتان زارداپ شەككەن ازاماتتارعا جان-جاقتى كومەك كورسەتىلەدى», — دەپ اتاپ ءوتتى رومان سكليار.

ەلەك وزەنى بويىنداعى تامدىداعى دامبىنىڭ ۇزىندىعى 2,6 شاقىرىم, بيىكتىگى 2-2,5 مەتر. دامبىدا 10 شليۋز ورنالاسقان. قازىر ونى جوندەۋ ماسەلەسى شەشىلىپ جاتىر.